(កៀវ)៖ ប្រធានាធិបតីអ៊ុយក្រែន លោក Volodymyr Zelenskiy នៅថ្ងៃអាទិត្យនេះបានច្រានចោលកិច្ចរចាជាមួយរុស្ស៊ី នៅក្នុងប្រទេស បេឡារុស ដោយនិយាយថាទីក្រុងមីនស្កិ៍ខ្លួនឯង កំពុងរួមដៃជាមួយរុស្ស៊ីក្នុងការឈ្លានពានអ៊ុយក្រែន។ តែបានបញ្ជាក់ថាត្រៀមខ្លួនជានិច្ច ចូលរួមក្នុងកិច្ចចរចាជាមួយរុស្ស៊ី នៅទីតាំង ឬប្រទេសផ្សេង ក្រៅពីបេឡារុស។

ប្រតិភូរុស្ស៊ីមួយក្រុម បានធ្វើដំណើរទៅដល់ប្រទេសបេឡារុសហើយនៅថ្ងៃអាទិត្យនេះ ដើម្បីបើកកិច្ចចរចាជាមួយអ៊ុយក្រែន នៅចំពោះមុខ សង្រ្គាមកាន់តែក្ដៅគគុក។ វាអាចនឹងក្លាយជាកិច្ចចរចាលើកដំបូងរវាងរុស្ស៊ី និងអ៊ុយក្រែន ចាប់តាំងពីទីក្រុងម៉ូស្គូបើកប្រតិបត្តិការយោធា កាលពីថ្ងៃទី២៤ ខែកុម្ភៈមក។

បើតាមអ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ បានបញ្ជាក់ថាប្រតិភូរុស្ស៊ី ក្នុងនោះរួមមានមន្ត្រីមកពីក្រសួងការបរទេស និងក្រសួងការពារជាតិ ព្រមទាំងការិយាល័យប្រធានាធិបតីលោក ពូទីន បានធ្វើដំណើរទៅដល់ប្រទេសបេឡារុសហើយ នៅថ្ងៃអាទិត្យនេះ ដើម្បីរង់ចាំជួបចរចាជាមួយសមាភាគីអ៊ុយក្រែន ក្នុងទីក្រុង ហ្គូមែល (Gomel)៕

ប្រភព៖ AFP