ខេត្តបន្ទាយមានជ័យ÷ ជនសង្ស័យម្នាក់ បានដើររកម៉ូយទិញម៉ូតូ ០១គ្រឿង ដែលបក្ខពួកម្នាក់យកមកផ្ញើឱ្យជួយលក់ ទាំងមិនមានឯកសារអ្វីទាំងអស់! លុះលក់មិនទាន់ដាច់ផង ក៏ត្រូវកម្លាំងជំនាញអាវុធហត្ថ ចាប់ឃាត់ខ្លួន ដកហូតម៉ូតូខាងលើ យកទៅប្រគល់ជូនម្ចាស់ដើមវិញ ខណៈម៉ូតូ ០១គ្រឿងនេះ ត្រូវបានជនសង្ស័យលួចយកទៅ អស់រយៈពេល ១០ថ្ងៃ កន្លងមកហើយ!!!។

ករណីលួចម៉ូតូនេះ បានកើតឡើង កាលពីវេលាម៉ោង ០៥:១៦នាទី(ទៀបភ្លឺ) ថ្ងៃទី២៧ ខែមិថុនា ឆ្នាំ២០២៦ នៅចំណុចមុខបន្ទប់ជួល ស្ថិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ លុះ រហូតមកដល់វេលាម៉ោង ១១:៣០នាទីព្រឹក ថ្ងៃទី០៧ ខែកក្កដា ឆ្នាំ២០២៦ ទើបសមត្ថកិច្ចស្រាវជ្រាវឃាត់ខ្លួនជនសង្ស័យបានម្នាក់ នៅចំណុចមណ្ឌល៨ ភូមិប្រជាធម្មកើត សង្កាត់អូរឫស្សី ក្រុងប៉ោយប៉ែត ។

ជនសង្ស័យដែលត្រូវបានឃាត់ខ្លួន មានឈ្មោះ និង ប៊ុនថាត់ ភេទប្រុស អាយុ២១ឆ្នាំ មុខរបរ(មិនពិតប្រាកដ) មានលំនៅ មណ្ឌល៨ ភូមិប្រជាធម្មកើត សង្កាត់អូរឫស្សី ក្រុងប៉ោយប៉ែត (មានសារធាតុញៀន)។ ចំណែកម៉ូតូដែលជនសង្ស័យលួចយកទៅ ម៉ាក Honda Dream សេ១២៥ ពណ៌ខ្មៅ ផលិតឆ្នាំ២០២៣ ពាក់ស្លាកលេខ បាត់ដំបង 1AR-4923 ជាកម្មសិទ្ធិរបស់ជនរងគ្រោះ ឈ្មោះ វ៉ាន់ គីនីន ភេទប្រុស អាយុ២៤ឆ្នាំ ស្នាក់នៅភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

មន្ត្រីជំនាញបានឱ្យដឹងថា: នៅថ្ងៃទី០៦ ខែកក្កដា ឆ្នាំ២០២៦ កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត បានទទួលបណ្តឹងពីជនរងគ្រោះឈ្មោះ វ៉ាន់ គីនីន ស្តីពីករណី: បាត់ម៉ូតូ ០១គ្រឿង ម៉ាកHonda Dream ឌ្រីម សេ១២៥ ពណ៌ខ្មៅ ផលិតឆ្នាំ២០២៣ ពាក់ស្លាកលេខ បាត់ដំបង 1AR-4923 កាលពីវេលាម៉ោង ០៥:១៦នាទី(ទៀបភ្លឺ ) ថ្ងៃទី២៧ ខែមិថុនា ឆ្នាំ២០២៦ នៅចំណុចមុខបន្ទប់ជួល ស្ថិតក្នុងភូមិចាន់គិរី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

ក្រោយពីទទួលបានបណ្តឹងខាងលើ លោក អនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានដឹកនាំកម្លាំង ចុះដល់ទីតាំងកើតហេតុខាងលើ ធ្វើការស្រាវជ្រាវនិងកំណត់មុខសញ្ញា រហូតដល់វេលាម៉ោង ១១:៣០នាទី ថ្ងៃទី០៧ ខែកក្កដា ឆ្នាំ២០២៦ បានធ្វើការឃាត់ខ្លួនជនសង្ស័យ ចំនួន០១នាក់ ឈ្មោះ និង ប៊ុនថាត់ រួមទាំងដកហូតវត្ថុតាង ហើយនាំមកកាន់មូលដ្ឋានកងរាជអាវុធហត្ថក្រុង ដើម្បីធ្វេីការសាកសួរបន្ត!។

ក្រោយឃាត់ខ្លួននិងសាកសួរ ជនសង្ស័យបានឆ្លើយសារភាពថា : ខ្លួនត្រូវបានបក្ខពួក ឈ្មោះ លី ហុង ភេទប្រុស អាយុ២៤ឆ្នាំ ស្នាក់នៅមណ្ឌល៤ ភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ឱ្យយកម៉ូតូខាងលើ ទៅលក់ ដែលគ្មានឯកសារគ្រប់គ្រាន់ ហើយត្រូវបានសមត្ថកិច្ចឃាត់ខ្លួនតែម្តង!។ ចំណែក ឈ្មោះ លី ហុង សមត្ថកិច្ចកំពុងស្រាវជ្រាវឃាត់ខ្លួនបន្ត។

ដោយផ្អែកលើចម្លើយសារភាព និងមានវត្ថុតាងជាក់ស្តែង កម្លាំងមូលដ្ឋានកងរាជអាវុធហត្ថក្រុងប៉ោយប៉ែត កសាងសំណុំរឿង បញ្ជូនមកកាន់បញ្ជាការដ្ឋានកងរាជអាវុធហត្ថខេត្ត ចាត់ការបន្តតាមនីតិវិធីច្បាប់!។

បច្ចុប្បន្នជនសង្ស័យខាងលើ ត្រូវបានកម្លាំងជំនាញ បញ្ជូនទៅសាលាដំបូងខេត្តបន្ទាយមានជ័យ ដើម្បីអនុវត្តតាមនីតិវិធីច្បាប់! ។ ចំណែកវត្ថុតាង (ម៉ូតូ) កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត បានប្រគល់ជូនម្ចាស់ដើមវិញហេីយ!៕