រលកសមុទ្របោកបក់លិចទូកនេសាទមួយគ្រឿង លង់លិចស្លាប់ម្នាក់ ជួយសង្គ្រោះបានម្នាក់

កោះកុង ៖ ទូកនេសាទមួយគ្រឿង ប្រភេទទូកអូស ជួបរលកសមុទ្របក់បោកធំៗ បណ្តាលឱ្យលិច ស្លាប់បាត់ខ្លួនម្នាក់ ជួយសង្គ្រោះបានម្នាក់ កាលពីវេលាម៉ោង៧នុង៤០នាទីព្រឹក ថ្ងៃទី១២ ខែកក្កដា ឆ្នាំ២០២៦ នៅក្នុងភូមិសាស្ត្រឃុំថ្មស ស្រុកបូទុមសាគរ ខេត្តកោះកុង ផ្អើលសមត្ថកិច្ច និងកម្លាំងការពារដែនទឹក ជួយស្វែងរក រហូតដល់វេលាម៉ោង១១និង៤៥នាទីព្រឹក ថ្ងៃទី១៣ ខែកក្កដា ឆ្នាំ២០២៦នេះទើបរកសាកសពឃើញ ។

តាមសមត្ថកិច្ចបានឱ្យដឹងថា សពជនរងគ្រោះមានឈ្មោះ អួក ផេង ភេទប្រុស អាយុ៣៤ឆ្នាំ ជាម្ចាស់ទូក មានទីលំនៅភូមិថ្មស ឃុំថ្មស ស្រុកបូទុមសាគរ ខេត្តកោះកុង ។

ប្រភពបន្តទៀតថា កាលពីព្រឹកថ្ងៃទី១២ ខែកក្កដា ឆ្នាំ២០២៦ ជនរងគ្រោះ និងកម្មករម្នាក់ទៀត បានចេញទូកអូសត្រី ស្រាប់តែនៅវេលាម៉ោងខាងលើ ជួបនឹងរលកបោកបក់ធំៗ បណ្តាលឱ្យលិចទូក លង់លិចបាត់ខ្លួនម្ចាស់ទូក ចំណែកកម្មករម្នាក់ ត្រូវបានក្រុមទូកនេសាទដូចគ្នាជួយសង្គ្រោះបាន ។

ក្រោយពីជួបគ្រោះបែបនេះ ផ្អើលក្រុមអ្នកនេសាទ សមត្ថកិច្ចមូលដ្ឋាន កម្លាំងការពារជើងទឹក ជួយស្វែងរក រហូតដល់ព្រឹកថ្ងៃទី១៣ ខែកក្កដា ឆ្នាំ២០២៦ ទើបប្រទះឃើញសាកសព ។

សពជនរងគ្រោះបន្ទាប់ពីស្រង់ឡើងគោក សមត្ថកិច្ចជំនាញធ្វើការពិនិត្យកោសល្យវិច័យ រួចប្រគល់ជូនក្រុមគ្រួសារចាត់ចែងយកទៅធ្វើបុណ្យតាមប្រពៃណី ៕