អាយុស្មេីម្តាយ! នៅក្មេងសោះហ៊ានចាប់រំលោភស្ត្រីម្នាក់អាយុ45ឆ្នាំរួចប្លន់លុយបានទៀត👈
👉ជនសង្ស័យម្នាក់ត្រូវបានកម្លាំងសមត្ថកិច្ចនៃអធិការដ្ឋាននគរបាលស្រុកអង្គរបូរី សហការជាមួយកម្លាំងប៉ុស្តិ៍នគរបាលរដ្ឋបាលពាក់ព័ន្ធ ធ្វើការស្រាវជ្រាវនិងឃាត់ខ្លួនបាន ក្រោយពីបានធ្វើសកម្មភាពចាប់រំលោភសេពសន្ថវៈទៅលើស្ត្រីម្នាក់បានសម្រេច រួចប្រមូលយកប្រាក់ចំនួន២.៥០០.០០០រៀល (ពីរលានហាសិបម៉ឺនរៀល) រត់គេចខ្លួន។
យោងតាមរបាយការណ៍ផ្លូវការពីអធិការដ្ឋាននគរបាលស្រុកអង្គរបូរី ដែលបានផ្សព្វផ្សាយព័ត៌មាននៅថ្ងៃទី១៤ ខែកក្កដា ឆ្នាំ ២០២៦ នេះបានឱ្យដឹងថា ករណីចាប់រំលោភ និងការលួចមានស្ថានទម្ងន់ទោសនេះ បានកើតឡើងកាលពីថ្ងៃទី១២ ខែកក្កដា ឆ្នាំ២០២៦ វេលាម៉ោង១ និង ៥០ នាទី រសៀល។ ទីតាំងកើតហេតុ គឺស្ថិតនៅចំណុចក្នុងរោងឃ្វាលទាមួយកន្លែង ក្នុងភូមិបាស្រែ ឃុំបាស្រែ ស្រុកអង្គរបូរី ខេត្តតាកែវ។
ប្រភពដដែលបានបន្តថា ជនរងគ្រោះនៅក្នុងហេតុការណ៍ដ៏អាក្រក់នេះ មានឈ្មោះ ឈ អ ភេទស្រី អាយុ ៤៥ឆ្នាំ មុខរបរកសិករ មានទីលំនៅបច្ចុប្បន្នភូមិយាផ្អើ ឃុំព្រៃផ្គាំ ស្រុកអង្គរបូរី ខេត្តតាកែវ។ នៅមុនពេលកើតហេតុ មានជនសង្ស័យម្នាក់មិនស្គាល់អត្តសញ្ញាណ បានលបចូលទៅធ្វើសកម្មភាពចាប់បង្ខំរំលោភសេពសន្ថវៈលើរូបនាងរហូតបានសម្រេច បន្ទាប់មកថែមទាំងបានប្លន់យកប្រាក់ចំនួន ២.៥០០.០០០ រៀល ដែលជារបស់ជនរងគ្រោះ ហើយរត់គេចខ្លួនបាត់ស្រមោលដោយសុវត្ថិភាព។
ក្រោយពេលកើតហេតុ ជនរងគ្រោះបានសម្រេចចិត្តដាក់ពាក្យបណ្តឹងស្វែងរកយុត្តិធម៌។ ភ្លាមៗបន្ទាប់ពីទទួលបានបណ្តឹង ស្នងការដ្ឋាននគរបាលខេត្តតាកែវ ជាពិសេសលោកវរសេនីយ៍ឯក នួន ប៉ិន អធិការនគរបាលស្រុកអង្គរបូរី បានដាក់បទបញ្ជាយ៉ាងម៉ឺងម៉ាត់ដល់កម្លាំងជំនាញនៃអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលបាស្រែ និងកម្លាំងប៉ុស្តិ៍នគរបាលរដ្ឋបាលព្រៃផ្គាំ ដើម្បីចុះទៅដល់កន្លែងកើតហេតុជាបន្ទាន់ និងបើកការស៊ើបអង្កេតស្រាវជ្រាវយ៉ាងក្តៅគគុក។
កិច្ចប្រតិបត្តិការស្វែងរកជនល្មើសបានធ្វើឡើងយ៉ាងយកចិត្តទុកដាក់ និងហ្មត់ចត់បំផុត រហូតឈានដល់ថ្ងៃទី ១៣ ខែកក្កដា ឆ្នាំ ២០២៦ វេលាម៉ោង៥និង ២០នាទីល្ងាច កម្លាំងសមត្ថកិច្ចចម្រុះបានកំណត់មុខសញ្ញាច្បាស់លាស់ និងបានឈានទៅដល់ការឃាត់ខ្លួនជនសង្ស័យម្នាក់ នៅចំណុចភូមិយាផ្អើរ ឃុំព្រៃផ្គាំ ស្រុកអង្គរបូរី។
សមត្ថកិច្ចបានឱ្យដឹងថា ជនសង្ស័យដែលត្រូវបានឃាត់ខ្លួននោះមានឈ្មោះ សុះ ស្រ៊ិន ភេទប្រុស អាយុ ១៩ឆ្នាំ មុខរបរមិនពិតប្រាកដ មានទីលំនៅបច្ចុប្បន្នភូមិព្រៃផ្គាំ(ខ) ឃុំព្រៃផ្គាំ ស្រុកអង្គរបូរី ខេត្តតាកែវ។
បច្ចុប្បន្ន ជនសង្ស័យឈ្មោះ សុះ ស្រ៊ិន ត្រូវបានកម្លាំងនគរបាលនាំខ្លួនទៅកាន់អធិការដ្ឋាននគរបាលស្រុកអង្គរបូរី ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងខេត្តតាកែវ ដើម្បីចាត់ការទៅតាមនីតិវិធីច្បាប់ជាធរមាន៕
