មិត្តភក្ដិទើបស្គាល់គ្នា ខ្ចីម៉ូតូជិះទៅដូរក្រវិលកំប៉ុងស្រាបៀរ រួចជិះគេចខ្លួនបាត់! ត្រូវសមត្ថកិច្ចចាប់ខ្លួន!!! ក្រុងតាខ្មៅ ខេត្តកណ្តាល

ខេត្តកណ្តាល÷ នៅថ្ងៃទី១៣ ខែកក្កដា ឆ្នាំ២០២៦នេះ សមត្ថកិច្ចជំនាញ ស្រាវជ្រាវឃាត់ខ្លួនជនសង្ស័យ០១នាក់ បន្ទាប់ពីជនសង្ស័យរូបនេះ បានធ្វើល្បិចខ្ចីម៉ូតូរបស់មិត្តភក្ដិ ដែលទើបស្គាល់គ្នា ហើយជិះគេចខ្លួនបាត់ ដោយប្រើល្បិចថា: សុំខ្ចីជិះយកក្រវិលកំប៉ុងទៅដូរ យកស្រាបៀរមកផឹកបន្តទៀត ! ។ ករណី: (រំលោភទំនុកចិត្ត)នេះ !កើតឡើងវេលាម៉ោង ១៣:១០នាទី រសៀល ថ្ងៃទី១១ កក្កដា ២០២៦ នៅចំណុចបន្ទប់ជួល ស្ថិតក្នុងភូមិព្រែកហូរលិច១ សង្កាត់ព្រែកហូរ ក្រុងតាខ្មៅ ខេត្តកណ្តាល ។

លោក វរសេនីយ៍ឯក យី វណ្ណដា អធិការនគរបាលក្រុងតាខ្មៅ បានឲ្យដឹងថា: ជនសង្ស័យដែលត្រូវឃាត់ខ្លួនមាន ឈ្មោះ ថុង សៀវវ័រ ភេទប្រុស អាយុ២៥ឆ្នាំ មុខរបរ (មិនពិតប្រាកដ) មានទីលំនៅភូមិធ្លក ឃុំដំណាក់ហ្លួង ស្រុកសំរោង ខេត្តតាកែវ និងមានសារធាតុញៀនក្នុងទឹកនោមវិជ្ជមាន ។ រីឯជនរងគ្រោះមាន ឈ្មោះ ឆាយ គឹមសៀង ភេទប្រុស អាយុ២៦ឆ្នាំ មុខរបរ (នៅផ្ទះ) ស្នាក់នៅបន្ទប់ជួលទីតាំងកើតហេតុខាងលើ។ ដោយឡែក ទ្រព្យសម្បត្តិដែលបាត់បង់គឺម៉ូតូ ០១គ្រឿង ម៉ាកស៊ុយហ្ស៊ុយគីឡែត ពណ៌ក្រហមលាយស ពាក់ផ្លាកលេខ កណ្តាល ១V:៧២៣៥។

លោក អធិការបានបន្តថា: មុនពេលកើតហេតុ ជនរងគ្រោះ និងជនសង្ស័យដែលទើបតែស្គាល់គ្នាបាន ០២ខែ បានបបួលគ្នាផឹកស្រាថ្នាំអស់ ០១លីត្រ និងស្រាបៀរអស់ ០៣កំប៉ុង ។ បន្ទាប់មក ជនសង្ស័យបានសុំខ្ចីម៉ូតូរបស់ជនរងគ្រោះដោយប្រាប់ថា: យកក្រវិលកំប៉ុងទៅដូរយកស្រាបៀរមកផឹកបន្តទៀត។ ក្រោយពេលជនរងគ្រោះប្រគល់កូនសោរឲ្យ ជនសង្ស័យក៏បានជិះម៉ូតូចេញទៅបាត់រហូតមិនឃើញត្រឡប់មកវិញឡើយ! ។ លុះដល់ថ្ងៃទី១២ កក្កដា ២០២៦ ទើបជនរងគ្រោះសម្រេចចិត្តរាយការណ៍ និងដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលព្រែកហូរ ដើម្បីឲ្យសមត្ថកិច្ចជួយស្រាវជ្រាវស្វែងរកចាប់ខ្លួន! ។

លោកអធិការបានបញ្ជាក់ថា : ក្រោយទទួលបានពាក្យបណ្ដឹង កម្លាំងសមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី១៣ ខែកក្កដា ឆ្នាំ២០២៦ ទើបឈានដល់ការឃាត់ខ្លួនជនសង្ស័យយកមកសួរនាំតែម្ដង! ។ នៅចំពោះមុខសមត្ថកិច្ច ជនសង្ស័យបានឆ្លើយសារភាពថា: ខ្លួនពិតជាបានធ្វើសកម្មភាពរំលោភលើទំនុកចិត្តដោយខ្ចីម៉ូតូរបស់ជនរងគ្រោះជិះគេចខ្លួនប្រាកដមែន! ។

បច្ចុប្បន្ន ជនសង្ស័យខាងលើ ត្រូវសមត្ថកិច្ច ឃាត់ខ្លួននៅអធិការដ្ឋាននគរបាលក្រុងតាខ្មៅ ! ដើម្បីកសាងសំណុំរឿងបន្តនីតិវិធីច្បាប់