ថ្មីៗនេះ មានការផ្សព្វផ្សាយព័ត៌មានលើបណ្តាញសង្គមដែលសម្ភាសន៍ជនរងគ្រោះករណីបាត់ម៉ូតូ៦គ្រឿង នៅក្នុងការដ្ឋានសំណង់ខុនដូមួយកន្លែង នៅខណ្ឌដង្កោ រាជធានីភ្នំពេញ ដោយជនរងគ្រោះបានសំណូមពរសមត្ថកិច្ចស្រាវជ្រាវបង្រ្កាបជនសង្ស័យ ហើយជួយរកម៉ូតូដែលបាត់បង់ជូនពួកគាត់វិញផង

ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមបញ្ជាក់ជូនសាធារណជនមេត្តាជ្រាបថា: កាលពីយប់ថ្ងៃទី៣ ខែកក្កដា ឆ្នាំ២០២៦ ត្រង់ចំណុចការដ្ឋានសំណង់ខុនដូរអារ៉ាខាវ៉ា ផ្លូវបេតុង ស្ថិតនៅភូមិក្រពើទ្រើម សង្កាត់រលួស ខណ្ឌដង្កោ រាជធានីភ្នំពេញ មានក្រុមជនសង្ស័យមានគ្នាប្រមាណ៨នាក់ ជិះម៉ូតូរ៉ឺម៉ក១គ្រឿង បានចូលធ្វើសកម្មភាពលួចយកម៉ូតូចំនួន៦គ្រឿងរបស់កម្មករសំណង់ដែលបានស្នាក់នៅក្នុងការដ្ឋានសំណង់ខាងលើចេញទៅបាត់។

ក្រោយពីបាត់ម៉ូតូនោះហើយជនរងគ្រោះបានមករាយការណ៍ និងដាក់ពាក្យបណ្តឹងនៅកន្លែងសមត្ថកិច្ចប៉ុស្តិ៍នគរបាលរដ្ឋបាលរលួស នៃអធិការដ្ឋាននគរបាលខណ្ឌដង្កោ។ បន្ទាប់ពីទទួលពាក្យបណ្តឹងពីជនរងគ្រោះ សមត្ថកិច្ចជំនាញព្រហ្មទណ្ឌនៃអធិការដ្ឋាននគរបាលខណ្ឌដង្កោ សហការជាមួយកម្លាំងប៉ុស្តិ៍នគរបាលរដ្ឋបាលរលួស ចុះទៅស្រាវជ្រាវនៅកន្លែងកើតហេតុ ។

លុះដល់ថ្ងៃទី៥ ខែកក្កដា ឆ្នាំ២០២៦ កម្លាំងជំនាញនៃអធិការដ្ឋាននគរបាលខណ្ឌដង្កោ សហការជាមួយកម្លាំងជំនាញនៃអធិការដ្ឋាននគរបាលខណ្ឌមានជ័យ និងកម្លាំងជំនាញការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យចំនួន៤នាក់ ប្រកបមុខរបរ រើសអេតចាយ ស្នាក់នៅទីលានចាក់សម្រាមក្នុងខណ្ឌមានជ័យ ជាបន្តបន្ទាប់ ហើយនាំខ្លួនយកមកសាកសួរនៅអធិការដ្ឋាននគរបាលខណ្ឌដង្កោ និងបានកសាងសំណុំរឿងបញ្ជូនទៅតុលាការ ចាត់ការតាមផ្លូវច្បាប់រួចហើយ។

ចំណែកបក្ខពួកនៅសេសសល់៤នាក់ទៀត សមត្ថកិច្ចកំពុងបន្តស្រាវជ្រាវស្វែងរកចាប់ខ្លួន ដើម្បីយកមកអនុវត្តតាមផ្លូវច្បាប់។ ចំណែកម៉ូតូជនរងគ្រោះបច្ចុប្បន្ន សមត្ថកិច្ចកំពុងបន្តយកចិត្តទុកដាក់ស្រាវជ្រាវស្វែងរក ដោយម៉ូតូទាំងនោះបក្ខពួកជនសង្ស័យដែលគេចខ្លួនជាអ្នកចាត់ចែងយកទៅលក់៕