កម្លាំងអាវុធហត្ថបង្ក្រាបជនជាតិចិន ៦នាក់ សង្ស័យពាក់ព័ន្ធករណីចាប់ជំរឹត នៅកណ្តាលរាជធានីភ្នំពេញ

រាជធានីភ្នំពេញ៖ កម្លាំងកងរាជអាវុធហត្ថខេត្តកំពត សហការជាមួយកម្លាំងកងរាជអាវុធហត្ថរាជធានីភ្នំពេញ បានបើកប្រតិបត្តិការចុះបង្ក្រាប និងឃាត់ខ្លួនជនជាតិចិនចំនួន ៦នាក់ ដែលសង្ស័យពាក់ព័ន្ធនឹងករណីចាប់ជំរឹត ខណៈជនរងគ្រោះម្នាក់ត្រូវបានរកឃើញ និងជួយសង្គ្រោះក្នុងប្រតិបត្តិការនេះ។

ប្រតិបត្តិការបង្ក្រាបបានធ្វើឡើងនៅវេលាម៉ោងប្រមាណ ១២:០០ រំលងអធ្រាត្រ ឈានចូលថ្ងៃទី៧ ខែសីហា ឆ្នាំ២០២៦ នៅអគារមួយកន្លែងក្បែរមាត់ទន្លេ លើវិថីព្រះស៊ីសុវត្ថិ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

តាមប្រភពព័ត៌មានបឋមបានឱ្យដឹងថា កម្លាំងអាវុធហត្ថខេត្តកំពត បានបើកការស៊ើបអង្កេត និងកំណត់មុខសញ្ញាជនសង្ស័យ រហូតឈានដល់ការតាមប្រមាញ់ ខណៈក្រុមជនសង្ស័យព្យាយាមរត់គេចខ្លួនពីខេត្តកំពត មកកាន់រាជធានីភ្នំពេញ។ ក្រោយមក កម្លាំងអាវុធហត្ថខេត្តកំពត បានសហការជាមួយកម្លាំងអាវុធហត្ថរាជធានីភ្នំពេញ ចុះឡោមព័ទ្ធទីតាំង និងឃាត់ខ្លួនជនសង្ស័យជាជនជាតិចិនទាំង៦នាក់។

ប្រភពដដែលបានបញ្ជាក់ថា សមត្ថកិច្ចសង្ស័យថា ក្រុមជនសង្ស័យមានជាប់ពាក់ព័ន្ធនឹងករណីចាប់ជំរឹត ហើយក្នុងប្រតិបត្តិការនោះ ក៏មានជនរងគ្រោះម្នាក់ត្រូវបានរកឃើញផងដែរ។

សមត្ថកិច្ចបានឱ្យដឹងបន្ថែមថា សំណុំរឿងនេះនៅមានមេក្លោងនៅពីក្រោយ ហើយកម្លាំងជំនាញកំពុងបន្តស្រាវជ្រាវ ស្វែងរក និងកំណត់អត្តសញ្ញាណអ្នកពាក់ព័ន្ធបន្ថែម ដើម្បីចាត់វិធានការតាមផ្លូវច្បាប់។

បច្ចុប្បន្ន ជនសង្ស័យទាំង៦នាក់ ត្រូវបានបញ្ជូនទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីសាកសួរ និងអនុវត្តនីតិវិធីច្បាប់បន្ត។