Post News Media ព័ត៌មានជាតិ បែក​ធ្លាយ​​ភា...

បែក​ធ្លាយ​​ភាព​មិន​ប្រក្រតី ​រឿង​​មេព្រៃ​ចាប់​រថយន្ដ​​សាំ​យ៉ុង ​ដឹក​ឈើ​ល្មើសច្បាប់​១​​​គ្រឿង​

ចែកចាយបន្ត

សៀមរាប: ប្រភពច្បាស់ការ បានទម្លាយឲ្យដឹងថា កម្លាំងរដ្ឋបាលព្រៃឈើ ខេត្តសៀមរាប សហការជាមួយសមត្ថកិច្ច ស្រុកអង្គរធំ បានស្ទាក់ចាប់រថយន្តសាំយ៉ុង ដឹកឈើមួយគ្រឿងផ្ទុកឈើលេខ១ គ្មានច្បាប់ យកទៅរក្សាទុកនៅស្នាក់ការ ផ្នែករដ្ឋបាលព្រៃឈើបន្ទាយស្រី។

ប្រភព ដដែលបានប្រាប់បន្ដថា ឈើទាំងនេះ ជាឈើអាវុធហត្ថស្រុកវ៉ារិន ។ ប្រតិបត្តិការឃាត់រថយន្តដឹកឈើនេះ បានធ្វើឡើងនៅវេលាម៉ោង១៦និង៣០នាទី ល្ងាចថ្ងៃទី០៤ ខែតុលា ឆ្នាំ២០១៦ក្នុងភូមិជប់ ឃុំជប់តាត្រាវ ស្រុកអង្គរធំ ខេត្តសៀមរាប ។

យោងតាមប្រភពព័ត៌មាន បានទម្លាយថា នៅរសៀលថ្ងៃទី០៤ ខែតុលានេះ មានរថយន្តសាំយ៉ុងផ្ទុកឈើពេញប្រៀប ដឹកចេញពីស្រុកវ៉ារិន ឆ្លងកាត់ស្រុកអង្គរជុំ ឆ្ពោះមកចែកចាយក្នុងក្រុងសៀមរាប តែត្រូវបានចាប់នៅព្រំប្រទល់ ស្រុកអង្គរធំតែម្តង។ ប្រភពបន្តថា ម្ចាស់ឈើគឺជានាយអាវុធហត្ថស្រុកវ៉ារិន ហើយកន្លងទៅពុំមាន នរណាហ៊ានចាប់នោះទេ ។

ទាក់ទិនទៅនឹងករណីនេះដែរ លោក ម៉ុង ប៊ុនលីម នាយផ្នែករដ្ឋបាលព្រៃឈើបន្ទាយស្រី បានឲ្យដឹងនាព្រឹកថ្ងៃទី០៦ ខែតុលានេះថា កម្លាំងរដ្ឋបាលព្រៃឈើ ខេត្តសៀមរាប សហការជាមួយសមត្ថកិច្ច ស្រុកអង្គរធំ បានធ្វើការស្ទាក់ចាប់រថយន្តសាំយ៉ុង ដឹកឈើមួយគ្រឿង ពណ៌ស ពាក់ស្លាកលេខ ភ្នំពេញ2H7907 ផ្ទុកឈើលេខ១ប្រភេទផ្ចឹក សុក្រម គ្មានច្បាប់ ដែលមានឈើចំនួន៨៧ដុំស្មើនឹង៣,៤៥០ម៉ែត្រគូប។ បច្ចុប្បន្ននេះ វត្ថុតាងត្រូវបានយកទៅរក្សាទុកនៅស្នាក់ការផ្នែករដ្ឋបាលព្រៃឈើ បន្ទាយស្រីដើម្បីរង់ចាំម្ចាស់ឈើចូលខ្លួន មកដោះស្រាយតាមច្បាប់ ។

លោកបន្តថា នៅពេលដែលសមត្ថកិច្ច កំពុងស្ទាក់ចាប់នោះ អ្នកបើកបររថយន្តល្មើសបានគេចខ្លួនបាត់។ លោក បានបន្ថែមថា ទោះបីគេចខ្លួនក៏ដោយនេះ មិនមែនជាឈើគ្រញូងនោះទេ អញ្ចឹង បើគាត់នៅក៏មិនអាចឃាត់ខ្លួន គាត់បានដែរដោយគ្រាន់តែ ផាកពិន័យតាមច្បាប់អន្តរកាល ។ យ៉ាងនេះក្តីគេបានសង្កេតឃើញថា ការដឹកជញ្ជូនឈើនៅស្រុកវ៉ារិន ត្រូវបានហក់ឡើងវិញហើយដូចទឹកបាក់ទំនប់ហើយ ការដឹកឈើនោះទៀត សោតភាគច្រើនគឺជាសមត្ថកិច្ចផងដែរ ៕

image_0_02_06_3d1ab6a9ce5121332c

image_0_02_06_841ef744ae8f116987