Post News Media ព័ត៌មានជាតិ លោក ម៉ៅ សុផាន...

លោក ម៉ៅ សុផាន់៖ កងទ័ពកម្ពុជា-ចិន នឹងធ្វើសមយុទ្ធយោធារួមគ្នានៅខែធ្នូឆ្នាំ២០១៦នេះ

ចែកចាយបន្ត

ភ្នំពេញ: កងយោធពលខេមរភូមិន្ទកម្ពុជា និងកងទ័ពរំដោះប្រជាជនចិន នៅអំឡុងខែធ្នូឆ្នាំ២០១៦ខាងមុខនេះ គ្រោងនឹងធ្វើសមយុទ្ធយោធាមួយរួមគ្នាដែលមានឈ្មោះថា « នាគមាស » ដើម្បីពង្រីកចំណេះដឹងផ្នែកយោធា និងផ្លាស់ប្តូរបទពិសោធន៍ពីគ្នាទៅវិញទៅមក។

លោកឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចថ្មើរជើង ង៧០ នៅព្រឹកថ្ងៃទី២១ ខែវិច្ឆិកានេះ នៅសាលាកងទ័ពជើងគោក ក្នុងខេត្តកំពង់ស្ពឺ បានបញ្ជាក់ឲ្យដឹងថា កងពលតូចថ្មើរជើង ង៧០ នឹងបញ្ជូនកម្លាំងចំនួន៧៦នាក់ ចូលរួមលំហាត់សមយុទ្ធ “នាគមាស” រវាងកងទ័ពកម្ពុជា និងកងទ័ពរំដោះប្រជាជនចិន ដើម្បីផ្លាស់ប្តូរបទពិសោធន៍ លើកិច្ចការមនុស្សធម៌ ការជួយសង្គ្រោះគ្រោះមហន្តរាយ ប្រឆាំងភេរវកម្ម និងការជួញដូរផ្សេងៗ។ ការថ្លែងដូចនេះ បានធ្វើឡើងនៅក្នុងជំនួបពិភាក្សាការងារជាមួយ លោកនាយឧត្តមសេនីយ៍ វ៉ាង ចាងឆឹង មេបញ្ជាការភាគខាងត្បូង នៃកងទ័ពរំដោះប្រជាជនចិន។

លោកឧត្តមសេនីយ៍ បានអំណរគុណចំពោះកងទ័ពរំដោះប្រជាជនចិន ដែលបានជួយឧបត្ថម្ភនូវរថយន្ត និងសម្ភារ:មួយចំនួនដល់កងពលតូច “ង៧០” ។ លោកបានចាត់ទុកដំណើរទស្សនកិច្ចរបស់គណ:ប្រតិភូយោធាចិន មកបញ្ជាការដ្ឋានកងពលលើកនេះ គឺជាឱកាសដ៏មានតម្លៃក្នុងការរឹតចំណងមិត្តភាព ភាតរភាព និងកិច្ចសហប្រតិបត្តិការ រវាងកងទ័ពទាំងពីរ បានកាន់តែរឹងមាំជាលំដាប់ និងបន្តប្រពៃណីទំនាក់ទំនងល្អ ផូរផង់ ដែលបានបន្សល់ទុក ដោយអតីតអ្នកដឹកនាំជំនាន់មុនៗមក។

លោកឧត្តមសេនីយ៍ឯក ក៏បានស្នើដល់កងទ័ពរំដោះប្រជាជនចិន ឲ្យផ្តល់ជំនួយឧបត្ថម្ភ ទាំងសម្ភារ: និងការបណ្តុះបណ្តាលជំនាញ ចំណេះដឹងបន្ថែមលើផ្នែកយោធា និងបច្ចេកទេសដល់កងយោធពលខេមរភូមិន្ទ តាមរយ:ក្រសួងការពារជាតិកម្ពុជា ពិសេសផ្តល់គ្រូមកហ្វឹកហ្វឺន ផ្នែកកងទ័ពពិសេស ប្រឆាំងភេរវកម្ម និងសុំឧបករណ៍បំពាក់កម្លាំងថ្មី សម្រាប់បំពេញភារកិច្ច ជូនរាជរដ្ឋាភិបាល និងស្ថេរភាពនៅកម្ពុជា៕

កងទ័ពកម្ពុជា-ចិន នឹងធ្វើសមយុទ្ធយោធា

កងទ័ពកម្ពុជា-ចិន នឹងធ្វើសមយុទ្ធយោធា