Post News Media ព័ត៌មានកីឡា លោក កែវ សារិន...

លោក កែវ សារិន ថាដោយសារតែផ្លាស់ប្តូរទម្រង់លេងទើបស្មើភ្នំពេញក្រោន ២ទល់២

ចែកចាយបន្ត

នៅក្នុងការប្រកួតសប្តាហ៍ទី ១១ នៃពានរង្វាន់លីគកំពូលកម្ពុជារដូវកាល ២០១៧ កាលពីល្ងាចថ្ងៃទី ១៤ ខែ ឧសភា ឆ្នាំ ២០១៧ កន្លងទៅ ក្រុមមជ្ឈមណ្ឌលកំចាត់មីនកម្ពុជា បានប្រកួតស្មើជាមួយ ភ្នំពេញក្រោន ដោយលទ្ធផល ២ទល់២ លើទឹកដីកីឡដ្ឋានស្តាតចាស់ ក្នុងលោក កែវ សារិន បានលើកឡើងថាដោយសារតែផ្លាស់ប្តូរទម្រង់បែបប្រយុទ្ធច្រើន។

នៅក្រោយចប់ការប្រកួត លោក កែវ សារិន ដែលជាគ្រូជំនួយរបស់ មជ្ឈមណ្ឌលកំចាត់មីនកម្ពុជា បានផ្តល់បទសម្ភាសន៍ថា៖ «ក្រោយពីពួកយើងបានផ្លាស់ប្តូរទម្រង់លេងពីការការពារច្រើនមកធ្វើការប្រយុទ្ធច្រើនវិញ ឃើញថាមានប្រសិទ្ធភាពខ្ពស់ដោយកូនក្រុមរបស់ខ្ញុំធ្វើការបានល្អ លេងមានភាពសុីចង្វាក់គ្នា ពិសេសនៅតំបន់ការពារហ្នឹងតែម្តងគឺធ្វើបានល្អណាស់ ប៉ុន្តែពូកគេប្រហែសនៅចុងម៉ោងបន្តិចសម្រាប់ការប្រកួតមួយនេះ ហើយក្រុមយើងមានឳកាសច្រើនតែខ្សែប្រយុទ្ធភ្លាត់បន្តិច កុំអីយើងទទួលជ័យជម្នះបាត់ហើយ »។ លោកបានបន្តទៀតថា​ នៅជុំទី២ពួកយើងនិងរក្សារទម្រង់លេងបែបនេះទៀត ដើម្បីទទួលបានចំណាត់ថ្នាក់ណាមួយដែលគេចផុតពីតំបន់ដែលត្រូវកាត់ចោលពីលីគកំពូលកម្ពុជា។

គិតត្រឹមសប្តាហ៍ទី ១១នេះ ក្លិបមជ្ឈមណ្ឌលកំចាត់មីនកម្ពុជា កំពុងតែស្ថិតនៅក្នុងតំបន់កាត់ចោលគឺចំណាត់ថ្នាក់លេខ ១១ ដែលបានប្រកួតចំនួន ១១ ដងក្នុងនោះឈ្នះម្ដង ស្មើ ៥ដង និងចាញ់ ៥ដង ដោយមានត្រឹមតែ ៨ពិន្ទុក្នុងដៃតែប៉ុណ្ណោះ៕