ខ្សែប្រយុទ្ធដ៍ឆ្នើមរបស់ក្រុម កាំភ្លើងធំ Arsenal បានរកច្រកចេញឃើញហើយ សម្រាប់ទៅកាន់ក្លិបថ្មី បើទោះបីជារូបគេមានការថយចុះ ប្រាក់ឈ្នួលប្រចាំសប្តាហ៍ ទាបជាងមុនក៍ដោយ។

បើតាមការចុះផ្សាយរបស់ Independent បានឲ្យដឹងថា Alexis Sanchez នឹងផ្លាស់មកកាន់ក្រុម Manchester City នៅរដូវក្តៅនេះ ដើម្បីបានបន្តលេង Champion League នៅរដូវកាលក្រោយនេះ។ ការយល់ព្រមទៅកាន់ Man City នេះ មិនមែនជាជម្រើសចុងក្រោយរបស់ខ្សែប្រយុទ្ធឈីលីរូបនេះឡើយ ព្រោះថា មានក្លិបជាច្រើន ដែលបានទាក់ទងរូបគេ ដូចជាក្រុម Bayern Munich, Paris Saint Germain, Juventus និងក្រុមមួយចំនួនទៀត ដែលចង់បាន Sanchez ។ យ៉ាងណាវិញ Alexis Sanchez បានសម្រេចចិត្តជ្រើសយក ក្រុម Manchester City ព្រោះថា រូបគេមានទំនាក់ទំនងល្អជាមួយលោក Pep Guadiola តាំងពីនៅ Barcelona ។ ម្យ៉ាងវិញទៀត Sanchez ចង់ស្ថិតនៅក្រោមការគ្រប់គ្រងរបស់លោក Pep ម្តងទៀត ដែលខ្សែប្រយុទ្ធឆ្នើមរូបនេះជឿជាក់ថា នៅក្រោមការដឹកនាំរបស់អ្នកចាត់ការជាតិអេស្ប៉ាញរូបនេះ ក្លិប ក៍ដូចជារូបគេផ្ទាល់ និឹងទទួលបានជោគជ័យ។

គួរបញ្ជាក់ផងដែរថា Sanchez កំពុងទទួលបានប្រាក់ប្រចាំសប្តាហ៍កើនឡើងពី ២៨ម៉ឺនផោន ទៅ ៣០ម៉ឺនផោន នៅ Arsenal ។ ក៍ប៉ុន្តែ ការផ្លាស់ទៅកាន់ Man City កីឡាករ Alexis Sanchez ជឿថា តម្លៃពលកម្មរបស់គេ អាចទទួលបានត្រឹម ២៥ម៉ឺនផោនប៉ុណ្ណោះ ក្នុងមួយសប្តាហ៍។ ដូច្នេះហើយ Sanchez បានត្រៀមខ្លួនក្នុងការទទួលយក ដោយមិនគិតពីលុយជាធំឡើយ ព្រោះថា ក្រៅពី Man City រូបគេអាចផ្លាស់ទៅកាន់ក្រុមផ្សេង ដោយទទួលបានតម្លៃខ្ពស់ ជាងនេះ តែ Sanchez មិនទៅឡើយ ដោយសារ Man City គឺជាកន្លែងដ៍ល្អសម្រាប់រូបគេ។