ភ្នំពេញៈ នៅទីបំផុតការ ប្រកួតយ៉ាងស្វិតស្វាញនៅក្នុងព្រឹត្តិការណ៍ប្រដាល់កំពូលជើងឯក K-Cement បានរកឃើញអ្នកឈ្នះជាម្ចាស់ជើងឯកហើយ កាលពីល្ងាចថ្ងៃទី២៨ ខែឧសភាមុននេះបន្តិច នៅលើសង្វៀនទូរទស្សន៍អាស៊ីអាគ្នេយ៍។

កីឡាករ ង៉ែត្រ រដ្ឋា មកពីក្លិបតាព្រហ្មមានជ័យ គឺជាអ្នកគ្រប់គ្រងតំណែងនោះ បន្ទាប់ពីបានយកឈ្នះកីឡាករ គង់ សំបូរ មកពីក្លិបក្រសួងការពារជាតិដោយពិន្ទុ។ ការប្រកួតរបស់ពួកគេ ត្រូវគេឃើញធ្វើឡើងយ៉ាងស្វិតស្វាញបំផុត ហើយកីឡាករអ្នកឈ្នះ ក៏បានទទួលជោគជ័យដោយសារតែ គង់ សំបូរ ភ្លាត់ត្រូវមួយដៃ បណ្ដាលឲ្យរាប់មួយលើកប៉ុណ្ណោះ។ អីចឹងហើយ ទើបកីឡាករអ្នកចាញ់ ហាក់តូចចិត្តខ្លាំងក្នុងពេលដែលគេមិនអាចជោគជ័យសម្រាប់ការប្រកួតក្នុងវគ្គដ៏សំខាន់នេះ។

ង៉ែត្រ រដ្ឋា ជាម្ចាស់ជើងឯកទទួលបានខ្សែក្រវាត់មួយ ពានមួយ និងទឹកប្រាក់១២លានរៀល។ កីឡាករ គង់ សំបូរ ចំណាត់ថ្នាក់ជើងឯករង ទទួលបានពានកិត្តិយសមួយ និងទឹកប្រាក់៨លានរៀល។ ដោយឡែក សម្រាប់ចំណាត់ថ្នាក់លេខ៣ គឺបានទៅលើកីឡាករ ម៉ន ព្រហ្មមាញ មកពីក្លិបការិយាល័យកងទ័ពជើងគោក ទទួលបានពានកិត្តិយសមួយ អមដោយទឹកប្រាក់៦លានរៀល និងកីឡាករ វេង សុភ័ក្រ្ត មកពីក្លិបកងទ័ពឆ័ត្រយោង៩១១ ទទួលបានពានកិត្តិយសមួយ អមដោយទឹកប្រាក់៤លានរៀល។

នេះជាការប្រកួតជើងឯក របស់ទូរទស្សន៍អាស៊ីអាគ្នេយ៍ ដែលបានធ្វើឡើងច្រើនខែមកហើយ និងទើបបញ្ចប់ដោយរកឃើញម្ចាស់ខ្សែក្រវាត់ ដែលអ្នកទស្សនាភាគច្រើនទន្ទឹងចង់ឃើញ៕