ភ្នំពេញៈ ក្រុមយុវជនអាយុក្រោម១៦ឆ្នាំអូស្ត្រាលី បានបំបាក់ក្រុមជើងឯកឆ្នាំ២០១៥ថៃ ដោយបាល់កាត់សេចក្តី ៥ទល់និង៣ ក្រសោបបានឱកាសឡើងវគ្គផ្តាច់ព្រ័ត្រពានរង្វាន់ AFF U16 Championship ឆ្នាំ២០១៦។

ក្រោយពីបញ្ចប់ការតស៊ូរយៈពេល៩០នាទី ក្រុមទាំង២បានត្រឹមស្មើគ្នា ៣ទល់និង៣។ ការប្រកួតឈានដល់វគ្គស៊ុតបាល់កាត់សេចក្តី១១ម៉ែត្រ អូស្ត្រាលីបានបើកការនាំមុខត្រឹមគ្រាប់ទី៣ ក្រោយកីឡាករលេខ១៧របស់ថៃ ស៊ុតបាល់បុកបង្គោលទី។ ចំណែក២គ្រាប់បន្ថែមទៀត អូស្ត្រាលី ក៏នៅតែស៊ុតបានសម្រេច។ សរុបលទ្ធផល អូស្ត្រាលី ឈ្នះ ថៃ ៥ទល់និង៣។

ជ័យជម្នះនេះ បានជួយឲ្យក្រុមកង់គូរូឡើងទៅចាំកម្ពុជា ឬវៀតណាម នៅវគ្គផ្តាច់ព្រ័ត្រជាស្រេច ខណៈថៃបានត្រឹមទៅដណ្តើមលេខ៣ប៉ុណ្ណោះ។