លោក Zinedine Zidane គ្រូបង្វឹកក្រុម Real Madrid បាននិយាយថាលោកចង់ឱ្យខ្សែបម្រើប្រយុទ្ធ James Rodriguez បន្តនៅជាមួយលោកទៀត ក្នុងរដូវកាលថ្មីខាងមុខនេះ ដោយមិនចង់ឱ្យរូបគេចាកចេញទេ។

James ត្រូវបានក្លឹបជាច្រើនទាក់ទងទិញយក បន្ទាប់ពីរូបគេមិនសូវបានចូលលេងជម្រើសដំបូងរបស់ក្រុម Real Madrid ឡើយ។ តែទោះជាយ៉ាងនេះក្ដី សាមីខ្លួនកីឡាកររូបនេះហាក់មិនចង់ចេញពីអេស្ប៉ាញនោះទេ ដោយរូបធ្លាប់និយាយថានឹងព្យាយាមបន្ថែមទៀត ដើម្បីជាប់ជម្រើស១១នាក់ដំបូងរបស់លោក Zidane ។

ដូចគ្នានេះដែរ គ្រូបង្វឹកសញ្ជាតិបារាំងខាងលើក៏បានបង្ហាញចំណាប់អារម្មណ៍ដែរថាលោកមិនទាន់ចង់ឱ្យខ្សែប្រយុទ្ធកូឡ៊ុំបីរូបនេះចាកចេញនៅឡើយទេ ដោយរូបគេមានសមត្ថភាពអាចពង្រឹងបន្ថែមដើម្បីជួយក្រុមអធិរាជសប្រជែងពានរង្វាន់រដូវកាលថ្មីបាន។ Zidane បន្ដថាលោកមានកីឡាករច្រើនដែលមានសមត្ថភាពប្រហាក់ប្រហែលគ្នា ដូច្នេះជម្រើសមានច្រើន ហើយកីឡាករក៏ត្រូវបានថាខ្លួនមានសមត្ថភាពលេចធ្លោជាងគេដែរ ទើបអាចជាប់១១នាក់ដំបូងបាន៕