គ្រូបង្គោលក្លឹបបឹងកេតអង្គរលោក ប្រាក់ សុវណ្ណរ៉ា បានចាត់ទុកថាខ្សែប្រយុទ្ធឆ្នើម ចាន់ វឌ្ឍានាកា ជាតារានាំសំណាងឲ្យបឹងកេតគ្រប់ពេលទាំងអស់។ ការលើកឡើងនេះ ក្រោយពេលខ្សែប្រយុទ្ធមានប្រភពពីខេត្តកំពតស៊ុតហែតទ្រីកជួយបឹងកេតអង្គរ បាន៣ពិន្ទុបន្តឈរកំពូលតារាងលីគកំពូលកម្ពុជា។

លោក ប្រាក់ សុវណ្ណរ៉ា ថាវឌ្ឍនាកាអាចប្រៀបជាអ្វីក៏បាន ព្រោះគាត់តែងតែរកគ្រាប់ឲ្យក្រុម ពិសេសគ្រាប់ជ័យជម្នះយប់មិញ និងពេលប៉ះអាស៊ីអឺរ៉ុបតាំងពីបើករដូវកាលមក។

« អាចនិយាយបានថា និយាយពីគុណភាពរបស់គាត់គឺពិបាកនិងនិយាយ។ យើងថាជាអីក៏បានដែរ ក៏ប៉ុន្តែគាត់ជាអ្នកនាំសំណាងឲ្យក្រុមគ្រប់ពេលទាំងអស់។ តាំងពីប្រកួតទី១ ដែលយើងវិះនិងស្មើជាមួយអាស៊ីអឺរ៉ុប ប៉ុន្តែគាត់ទាត់ចូលភ្លាមចប់ល្មម។» សម្តី ប្រាក់ សុវណ្ណរ៉ា។

ភ្នំពេញក្រោន បានបើកការនាំមុខ ក្នុងជំនួបដ៏សំខាន់យប់មិញ ត្រឹមនាទីទី៥ ដោយខ្សែប្រយុទ្ធ Jang In Yong ប៉ុន្តែត្រូវវឌ្ឍានាវាយបកបាន៣គ្រាប់វិញ មុន កែវ សុខផេង សងវិញបាន១គ្រាប់នៅចុងវគ្គទី២។ ចប់ការប្រកួត បឹងកេតឈ្នះភ្នំពេញក្រោន ៣-២។

បឹងកេត ក្រសោបបាន៣ពិន្ទុបន្ថែម ដើម្បីរក្សាគម្លាត១ពិន្ទុពីគូប្រជែងក្រសួងកាពារជាតិ។ ២ប្រកួតដែលនៅសល់ ក្រុមដែលមានមូលដ្ឋាននៅខេត្តកំពង់ចាម នឹងប៉ះ ព្រះខ័នរាជស្វាយរៀង និង ប៉ូលិស ខណៈទ័ពប៉ះស៊ីម៉ាក់ និងអាស៊ីអឺរ៉ុប។