ខ្សែប្រយុទ្ធ Sergio Aguero ជឿជាក់ថាក្រោមការដឹកនាំរបស់លោក Pep Guardiola ក្លឹប Manchester City នឹងទទួលបានជោគជ័យ ហើយគ្មានក្លឹបណាដែលអាចយកឈ្នះពួកគេបានឡើយ។

ប្រកួតសប្ដាហ៍ទី២ ពានរង្វាន់លីគកំពូលអង់គ្លេស ក្រុម Man City បានយកឈ្នះ Stoke City ដោយលទ្ធផល ៤-១ ខណៈដែល Aguero ជាអ្នករកបាន២គ្រាប់ក្នុងប្រកួតនេះ។ ក្រោយជ័យជម្នះនេះដែរ បានធ្វើឱ្យអ្នកគាំទ្រក្រុមមេឃខៀវ កាន់តែញញឹមបានច្រើនហើយ ព្រោះឃើញទម្រង់លេងរបស់ក្រុមល្អជាងមុនឆ្ងាយ។

កីឡាករ Sergio Aguero បាននិយាយចំពោះចំណុចនេះដែរថា៖ “យើងមានទំនុកចិត្តច្រើន ក្នុងរដូវកាលនេះ ទាំងលីគកំពូល និងបានរង្វាន់ Champions League។ វាមិនមែនជារឿងងាយទេ ប៉ុន្តែយើងជឿជាក់ថាក្រុមទាំងមូលនឹងធ្វើបានល្អ។ វាគ្មានអ្វីដែលអាចរាំងស្ទះយើងបានឡើយ”។

Man City ក្រោមការដឹកនាំរបស់ Pep មានការផ្លាស់ប្ដូរច្រើន ដោយសូម្បីតែអ្នកចាំទី Joe Hart ក៏ត្រូវអង្គុយកៅអីបម្រុងដែរ ហើយត្រៀមនឹងចាកចេញពីក្លឹបនៅពេលខាងមុខនេះទៀតផង៕