គន្លឹះ ៥ យ៉ាង...

គន្លឹះ ៥ យ៉ាង អ្នកប្រើប្រាស់ iPhone 7/7 Plus ថ្មីថ្មោងចាំបាច់ត្រូវដឹងជាមុន

ចែកចាយបន្ត

iphone-7-features-iphone-7-specs-15-2

iPhone 7/ 7 Plus គឺជាស្មាតហ្វូនចុងក្រោយរបស់ក្រុមហ៊ុន Apple ដែលពាំនាំមកជាមួយនូវការផ្លាស់ប្តូរ គួរឱ្យកត់សម្គាល់ និងភ្ញាក់ផ្អើលបំផុតទាំងលើផ្នែក Hardware ទាំងលើផ្នែក Software។ ក្នុងនោះ មានចំណុចថ្មីៗមួយចំនួន ដែលអ្នកប្រើប្រាស់អាចនឹងមិនដឹង ឬភ័នច្រឡំថាដូចជាស៊េរី iPhone មុនៗ ហើយអាចនឹងធ្វើឱ្យជួបការខូចបង់ ឬមិនបានទាញយកផលប្រយោជន៍នៃមុខងារពិសេសថ្មីៗទាំងនោះ។ ម្លោះហើយ Post Tech សូមលើកយកចំណុចគន្លឹះសំខាន់ៗចំនួន ៥ យ៉ាង ដែលអ្នកប្រើប្រាស់ iPhone 7/ 7 Plus ថ្មីថ្មោងចាំបាច់ត្រូវដឹង មកបង្ហាញជូនដូចតទៅ៖

១- ប្រយ័ត្នសារព្រមានរបស់ក្រុមហ៊ុន Apple ពីសមត្ថភាពការពារទឹកជ្រាប

សមត្ថភាពការពារទឹកជ្រាបរបស់ iPhone 7 ក៏ដូចជា 7 Plus គឺជាលក្ខណៈសម្បត្តិគួរឱ្យភ្ញាក់ផ្អើលបំផុតមួយ សម្រាប់អ្នកនិយមផលិតផល Apple ទោះបីជាវាមាននៅលើផលិតផលទូរស័ព្ទប្រភេទ Android ដូចជារបស់ក្រុមហ៊ុន Samsung មួយឆ្នាំពីរមកហើយក្តី។ តាមលក្ខណៈបច្ចេកទេស វាពិតជាមិនជ្រាបទឹកមែន ប៉ុន្តែ នោះមិនមែនមានន័យថា វាអាចធានាបាន ១០០% គ្រប់ពេល គ្រប់កាលៈទេសៈនោះទេ។

ចំណុចដែលលោកអ្នកគួរតែចងចាំជាងគេ គឺក្រុមហ៊ុន Apple ព្រមានទៅដល់អ្នកប្រើប្រាស់ iPhone 7 និង 7 Plus មិនឱ្យប្រើប្រាស់រន្ធសាកថ្ម ឬរន្ធដោតកាសនៅពេលដែលទូរស័ព្ទទទឹកនោះទេ។ មូលហេតុគឺ នៅពេលដែលអ្នកដោតអ្វីមួយ ចូលទៅក្នុងតួទូរស័ព្ទ ខណៈពេលសើម វាអាចនឹងនាំទឹក ចូលទៅក្នុងម៉ាស៊ីនទូរស័ព្ទ ត្រង់តំបន់ដែលគ្មានស្រទាប់ការពារជម្រាបទឹក ហើយអាចនឹងឆ្លងចូលដល់តំបន់គ្រោះថ្នាក់ក៏ថាបាន។

iphone-7-tips-waterproof-feature

២- ចាំបាច់ត្រូវដឹងពីវិធីបិទ/បើកដោយបង្ខំថ្មីសម្រាប់ករណីទូរស័ព្ទជាប់គាំង

លោកអ្នកត្រូវកត់ចំណាំទុកថា iPhone 7/ 7 Plus មិនអនុញ្ញាតឱ្យអ្នកចុចលើប៊ូតុង Home និងប៊ូតុងបិទ/បើក ដំណាលគ្នា ដើម្បីបិទ/បើកដោយបង្ខំនៅពេលដែលវាជាប់គាំង ឬមានដំណើរការមិនប្រក្រតីដូចស៊េរីមុនៗនោះទេ ដោយវាត្រូវបានប្តូរទៅវិធីមួយផ្សេងទៀត គឺលោកអ្នកត្រូវចុចសង្កត់ជាប់លើប៊ូតុងបិទ/បើកនៅខាងស្តាំ និងប៊ូតុងបន្ថយសំឡេងនៅខាងឆ្វេងដំណាលគ្នាវិញ។

៣- ទិញឌុយតសម្រាប់សាកថ្មកាស និងថ្មទូរស័ព្ទជាមួយគ្នា

iPhone 7 និង 7 Plus មិនមានរន្ធដោតកាសដូច iPhone ស៊េរីមុនៗទេ ដោយកាសឥតខ្សែថ្មីរបស់វា ក៏ត្រូវការការសាកបញ្ចូលថាមពលថ្មដែរ។ ម្លោះហើយ ប្រសិនបើអ្នកចង់ស្តាប់ចម្រៀង ក្នុងពេលកំពុងសាកថ្មទូរស័ព្ទ ពិតជាពិបាក។ ទោះយ៉ាងណា Apple មានដំណោះស្រាយចំពោះបញ្ហានេះ ដោយក្រុមហ៊ុនមានផលិតចេញឌុយសាកថ្មរន្ធពីរ សម្រាប់លោកអ្នកអាចទិញប្រើបន្ថែម។ ឌុយនោះ គឺមានរន្ធពីរ អនុញ្ញាតឱ្យអ្នកសាកថ្មកាស និងថ្មទូរស័ព្ទក្នុងពេលដំណាលគ្នាបាន។

iphone-7-tips-power-port-adapter

៤- កំណត់ញាណរបស់ប៊ូតុង Home

ប៊ូតុង Home នៅលើ iPhone 7/ 7 Plus មិនមែនជាប៊ូតុងចុចសង្កត់ដូចមុននោះទេ ពោលគឺ វាជាប៊ូតុងប៉ះដែលបំពាក់ដោយញាណមានកម្លាំងរំញោចពិសេស អាចឆ្លើយតបកម្លាំងប៉ះនៃម្រាមដៃរបស់អ្នកបាន ៣ កម្រិត (ខ្លាំង មធ្យម និងថើរ)។ ជាមួយប៊ូតុង Home ថ្មីនេះ លោកអ្នកចាំបាច់ត្រូវចូលទៅធ្វើការកំណត់កម្រិត រំញោចមួយ ក្នុងចំណោមកម្រិតរំញោច ៣ ជាមុនដោយ៖

– ជាដំបូង សូមចូលទៅកាន់ Settings -> General -> Home Button

– បន្ទាប់មក ចុចលើកម្រិតរំញោចមួយ ក្នុងចំណោមកម្រិតរំញោច ៣ ដែលបានផ្តល់ឱ្យ តាមចិត្តចង់របស់លោកអ្នក។

– ជាចុងក្រោយ សូមប៉ះលើ “Done” នៅជ្រុងខាងស្តាំដៃ ដើម្បីរក្សាទុក (save) ការកំណត់របស់អ្នក។

៥- សាកល្បងប្រើមុខងារម៉ោងរោទិ៍ថ្មី

Bedtime គឺជាមុខងារម៉ោងរោទិ៍ថ្មីមួយ ដែលត្រូវបានភ្ជាប់មករួចជាស្រេចនៅលើប្រព័ន្ធប្រតិបត្តិ iOS ចាប់ពីជំនាន់ទី ១០។ ថ្វីត្បិតតែមុខងារនេះ មិនសំខាន់ចាំបាច់ សម្រាប់អ្នកប្រើប្រាស់ iPhone 7/7 Plus ក៏ដោយ ប៉ុន្តែ អ្នកគួរតែឆែកលមើល ថាតើវាមានគុណប្រយោជន៍ ចំពោះលោកអ្នកប៉ុណ្ណា។ ជាការពិត កម្មវិធីម៉ោងរោទិ៍ថ្មីនេះ អាចក្រើនរំឭកអ្នកថា ពេលណាគួរចូលគេងដើម្បីទទួលបានអាហារដំណេកគ្រប់គ្រាន់ពេញមួយយប់។ កម្មវិធីនេះ ក៏អាចធ្វើការតាមដានទម្លាប់នៃការទទួលទានដំណេករបស់អ្នកផងដែរ ដើម្បីជួយអ្នកក្នុងការស្វែងយល់បន្ថែម អំពីទម្លាប់នៃដំណេកដែលល្អប្រសើរ និងកំណត់ដឹងផលប៉ះពាល់ផ្សេងៗ ដែលកើតចេញពីឥរិយាបថ នៃដំណេកមិនត្រឹមត្រូវរបស់អ្នក៕

ចែកចាយបន្ត