Post News Media ព័ត៌មានបច្ចេកវិទ្យា តើ iPhone 8 អ...

តើ iPhone 8 អាចប្រជែងឈ្នះ Galaxy S8 ដែរឬទេ បើវាមានរូបរាងដូចនេះ?

ចែកចាយបន្ត

Apple និង Samsung គឺជាគូប្រកួតប្រជែងនឹងគ្នាទាំងលើបចេ្ចកវិជ្ជាចល័ត ទាំងលើផ្លូវច្បាប់ យូរឆ្នាំមកហើយ ហើយសម្រាប់ឆ្នាំ ២០១៧ នេះ ក៏នឹងមិនខុសគ្នាដែរ។ យោងតាមព័ត៌មានក្រៅផ្លូវការកន្លងមក ក្រុមហ៊ុនទាំងពីរ សុទ្ធតែគ្រោងយុទ្ធសាស្ត្រទប់ទល់ជាមួយគូបដិបក្ខរបស់ខ្លួនរួចស្រេចទៅហើយសម្រាប់ផលិតផល iPhone និង Galaxy S ជំនាន់ថ្មីនោះ។

សម្រាប់ក្រុមហ៊ុន Apple នឹងមិនបញ្ចេញ iPhone 8 មុនខែសីហា ឡើយ គឺខុសពីក្រុមហ៊ុន Samsung ដែលនឹងប្រកាសចេញ Galaxy S8 ក្នុងខែមិនាខាងមុខនេះហើយ។ ទន្ទឹមនឹងនោះ ព័ត៌មានក្រៅផ្លូវជាច្រើនទាក់ទងទៅនឹងលក្ខណ:សម្បត្តិរបស់ Samsung Galaxy ត្រកូល S ជំនាន់ទី ៨ ត្រូវបានទម្លាយចេញជាហូរហែ ប៉ុន្តែ គេមិនធ្លាប់បានឃើញរូបរាងពិតប្រាកដរបស់វាយ៉ាងណានោះទេ។

លោក Veniamin Geskin អ្នកករចនាក្រាហ្វិកគំរូទូរសព្ទមួយរូប ដែលបានបញ្ចេញម៉ូដទូរសព្ទមួយចំនួនដើម្បីទាញចំណាប់អារម្មណ៍របស់មហាជនកន្លងមកនោះ ឥឡូវគាត់បានបញ្ចេញរូបរាងទូរសព្ទ Galaxy S8 ពិតជាក់ស្តែងមួយ ដោយចម្លងម៉ូដតាមព័ត៌មានដែលបានបែកធ្លាយ។ វាមានផ្ទៃអេក្រង់លាតសន្ធឹងគ្របដណ្តប់ស្ទើរតែដល់គែមទូរសព្ទខាងលើ និងខាងក្រោម ហើយគែមអេក្រង់សងខាងកោងស្រដៀងទៅនឹង Galaxy S7 Edge និងគ្មានប៊ូតុង Home អ្វីឡើយ។

យោងតាមព័ត៌មានចចាមអារ៉ាមកន្លងមកបានអះអាងថា Samsung នឹងបំពាក់បន្ទះស្គេនក្រយៅដៃនៅខាងក្រោមផ្ទៃអេក្រង់របស់ Galaxy S8 តែម្តង។ ដោយឡែក Apple ក៏នឹងធ្វើដូច្នេះចំពោះ iPhone 8 របស់ខ្លួនអីចឹងដែរ ឬបើមិនដូច្នោះទេ វានឹងត្រូវបានប្តូរទៅដាក់នៅខាងខ្នងទូរសព្ទវិញ។

ទោះយ៉ាងណា គេមិនអាចសន្និដ្ឋានថា គំរូទូរសព្ទរបស់លោក Geskin នឹងអាចត្រឹមត្រូវបានដល់កម្រិតណានោះទេ ប៉ុន្តែ ប្រសិនបើក្រុមហ៊ុន Samsung ពិតជាអាចបញ្ចេញរចនាបថ Galaxy S8 ដូច្នេះមែននោះ iPhone 8 របស់ក្រុមហ៊ុន Apple នឹងពិបាកប្រកួតប្រជែងជាមួយផលិតផលលំដាប់កំពូលរបស់ Samsung មួយនេះជាមិនខាន៕

ប្រភពព័ត៌មាន: bgr