Post News Media ព័ត៌មានបច្ចេកវិទ្យា រឿងអាស្រូវក្រ...

រឿងអាស្រូវក្រុមហ៊ុនផលិតរថយន្ត Volkswagen ឈានដល់ការចាប់ខ្លួននាយកប្រតិបត្តិម្នាក់

ចែកចាយបន្ត

ការិយាល័យស៊ើបអង្កេតសហព័ន្ធ F.B.I របស់សហរដ្ឋអាមេរិក បានចាប់ខ្លួននាយកប្រតិបត្តិក្រុមហ៊ុន Volkswagen មួយរូប ក្រោមបទចោទឃុបឃិតបោកប្រាស់រដ្ឋការអាមេរិក ពាក់ព័ន្ធនឹងសំណុំរឿងអាស្រូវលួចបន្លំលទ្ធផលនៃការសាកល្បងកម្រិតបំភាយឧស្ម័នពុលចេញពីរថយន្ត Volkswagen។ នេះបើយោងតាមមន្ត្រីអនុវត្តច្បាប់ម្នាក់ និងអ្នកដឹងហេតុការម្នាក់ ថ្លែងប្រាប់។

លោក Oliver Schmidt អ្នកដែលបានដឹកនាំការិយាល័យត្រួតពិនិត្យបែបបទផ្លូវច្បាប់របស់ក្រុមហ៊ុន Volkswagen នៅសហរដ្ឋអាមេរិក ពីឆ្នាំ ២០១៤ ដល់ឆ្នាំ ២០១៥ ត្រូវបានចាប់ខ្លួននៅថ្ងៃសៅរ៍ ដោយក្រុមភ្នាក់ងារស៊ើបអង្កេតក្នុងរដ្ឋ Florida ហើយត្រូវបានគេរំពឹងថា នឹងត្រូវបានចោទប្រកាន់នៅថ្ងៃច័ន្ទនេះ ក្នុងទីក្រុង Detroit។ នេះបើយោងប្រភពសាក្សីដដែលបានថ្លែងបន្ថែម។

មេធាវីតំណាងលោក Schmidt មន្ត្រីក្រសួងយុត្តិធម៌ រួមទាំងអ្នកនាំពាក្យភ្នាក់ងារ F.B.I មិនអាចស្នើសុំការអត្ថាធិប្បាយចំពោះរឿងនេះបាននៅឡើយទេ កាលពីល្ងាចថ្ងៃអាទិត្យ។
នៅក្នុងសេចក្តីថ្លែងការមួយ លោក Jeanine Ginivan អ្នកនាំពាក្យក្រុមហ៊ុន Volkswagen បាននិយាយថា «Volkswagen តែងបន្តកិច្ចសហប្រតិបត្តិការជាមួយនាយកដ្ឋានយុត្តិធម៌ជានិច្ច ប៉ុន្តែ ក្រុមហ៊ុននឹងមិនធ្វើសេចក្តីអធិប្បាយខណ:ការស៊ើបអង្កេតកំពុងបន្ត»។

នៅក្នុងបណ្តឹងប្រឆាំងក្រុមហ៊ុន Volkswagen អគ្គមេធាវីរដ្ឋ Massachusetts និង New York បានចោទប្រកាន់លោក Schmidt ថាជាតួអង្គសំខាន់មួយក្នុងកិច្ចខំប្រឹងប្រែងបិទបាំង និងបន្លំរបាយការណ៍កម្រិតបំភាយឧស្ម័នពុលចេញពីរថយន្តម៉ាស៊ូតក្រុមហ៊ុនរបស់ខ្លួន ពីភ្នាក់ងារនិយតករសហរដ្ឋអាមេរិក។

ចាប់តាំងពីចុងឆ្នាំ ២០១៤ លោក Schmidt និងមន្ត្រីក្រុមហ៊ុន Volkswagen ផ្សេងទៀត បានលើកឡើងនូវពាក្យពេចន៍ភូតភរដដែលៗ ទាក់ទងទៅនឹងការបំភាយឧស្ម័នពុលក្នុងកម្រិតមួយដ៏ខ្ពស់ចេញពីរថយន្តអាល្លឺម៉ង់របស់ពួកគេ។ នេះបើតាមការថ្លែងឱ្យដឹងពីអគ្គមេធាវី ហើយក្នុងឆ្នាំ ២០១៥ លោក Schmidt បានទទួលស្គាល់អំពីអត្ថិភាពឧបករណ៍ដែលអាចបំភាន់លទ្ធផលសាកល្បងកម្រិតបំភាយឧស្ម័នពុលចេញពីរថយន្ត Volkswagen ផ្សេងៗ៕

ប្រភពព័ត៌មាន៖ nytimes