Post News Media ព័ត៌មានបច្ចេកវិទ្យា ខួរក្បាលមនុស្...

ខួរក្បាលមនុស្សអាចនឹងក្លាយជា FlashDrive បើក្រុមហ៊ុនថ្មីរបស់ Elon Musk ជោគជ័យ

ចែកចាយបន្ត

លោក Elon Musk ដែលជាប្រធានក្រុមហ៊ុនអវកាស SpaceX និងផលិតរថយន្ត Tesla ទើបបានបើកក្រុមហ៊ុនថ្មីមួយឈ្មោះ Neuralink ដើម្បីធ្វើការអភិវឌ្ឍបច្ចេកវិទ្យាតភ្ជាប់ខួរក្បាលមនុស្សជា​មួយម៉ាស៊ីនកុំព្យូទ័រ។ នេះបើយោងតាមសេចក្តីរាយការណ៍របស់លោក Rolfe Winkler ពីសារព័ត៌មាន The Wall Street Journal។

សេចក្តីរាយការណ៍ដដែលបានបន្ថែមថា ក្រុមហ៊ុនដែលមានមូលដ្ឋាននៅរដ្ឋកាលីហ្វ័រនីញ៉ា សហរដ្ឋអាមេរិក និងដែលបានចុះបញ្ជីជាក្រុមហ៊ុនស្រាវជ្រាវផ្នែកវេជ្ជសាស្រ្តក្នុងរដ្ឋ កាលពីខែកក្កដានោះ មានគោលដៅអភិវឌ្ឍបច្ចេកវិទ្យា ‘Neural Lace’ ដែលអាចប្រើសម្រាប់តភ្ជាប់ទៅកាន់សំណុំសរសៃប្រសាទជាមួយម៉ាស៊ីនកុំព្យូទ័រ ដើម្បីបញ្ចូនសារ ទិន្នន័យ ឬព័ត៌មានទៅមករវាងគ្នាដោយផ្ទាល់បាន។

បច្ចេកវិទ្យា Neural Lace នេះ ប្រើប្រាស់នូវការចាក់បញ្ចូលអេឡិចត្រូតចូលទៅក្នុងខួរក្បាល ដើម្បីទាញចេញ (Download) ឬទាញចូល (Upload) នូវទិន្នន័យដែលជាការគិតរបស់មនុស្ស ទៅមកជាមួយកុំព្យូទ័របាន ហើយវានឹងអាចបង្កើនមុខងារនៃការយល់ដឹងឱ្យឈានដល់កម្រិតកាន់តែខ្ពស់។

ការប្រកាសអំពីវត្តមានក្រុមហ៊ុន Neuralink នេះដែរ គឺធ្វើឡើងបន្ទាប់ពី មហាសេដ្ឋីលំដាប់ទី ៨០ របស់ពិភពលោករូបនេះ បានបង្ហាញពីចំណាប់អារម្មណ៍ទាក់ទងទៅនឹងបច្ចេកវិទ្យា Neural Lace កាលពីឆ្នាំមុន នៅក្នុងវេទិកាស Code Conference របស់ក្រុមហ៊ុនបណ្តាញផ្សព្វផ្សាយ Vox Media ដោយនិយាយថា ផលិតផលបច្ចេកវិទ្យា Neural Lace នឹងអនុញ្ញាតឱ្យមនុស្សមានសម្ព័ន្ធជីវសាស្រ្ត (អន្តរសកម្មភាពរវាងសរីរាង្គមនុស្សជាមួយម៉ាស៊ីន) ជាមួយម៉ាស៊ីនបាន។

គួរបញ្ជាក់ថា នេះមិនមែនជាលើកទីមួយទេដែលក្រុមហ៊ុនអភិវឌ្ឍបច្ចេកវិទ្យានេះ ត្រូវបានប្រកាសឡើងនោះ។ កន្លងមកក៏មានដែរ ក្រុមហ៊ុន Facebook ដែលត្រូវគេរាយការណ៍មកថា កំពុងអភិវឌ្ឍបច្ចេកវិទ្យាស្រដៀងគ្នានេះ តាមរយ:ក្រុមហ៊ុនបុត្រសម្ព័ន្ធផ្នែក Hardware សម្ងាត់របស់ខ្លួនមួយឈ្មោះ Building 8៕

ប្រភពព័ត៌មាន: businessinsider

ចែកចាយបន្ត