Post News Media ព័ត៌មានបច្ចេកវិទ្យា វ៉ូវ! ការវះកា...

វ៉ូវ! ការវះកាត់ប្តូរក្បាលមនុស្សលើកដំបូងបង្អស់ក្នុងប្រវិត្តសាស្ត្រមនុស្សលោក នឹងធ្វើឡើងឆាប់ៗនេះ

ចែកចាយបន្ត

ការវះកាត់ប្តូរក្បាលមនុស្សលើកដំបូងបង្អស់ក្នុងប្រវត្តិវេជ្ជសាស្រ្តរបស់មនុស្សលោក នឹងត្រូវបានរៀបចំធ្វើឡើងក្នុងរយ:ពេល ១០ ខែខាងមុខទៀតប៉ុណ្ណោះ។ នេះបើយោងតាមការថ្លែងអះអាងរបស់លោកវេជ្ជបណ្ឌិតអ៉ីតាលីម្នាក់ កាលពីថ្ងៃព្រហស្បត្តិ៍។

វេជ្ជបណ្ឌិតឯកទេសវះកាត់ លោក Sergio Canavero បានប្រកាសនៅក្នុងបទសម្ភាស៍មួយ ជាមួយទស្សនាវដ្តីអាល្លឺម៉ង់ OOOM ថា លោកនឹងរៀបចំការវះកាត់ប្តូរក្បាលមនុស្សជាលើកដំបូងបង្អស់នៅលើពិភពលោកឱ្យបានមុនពេលនេះ នៅឆ្នាំក្រោយ ក្នុងប្រទេសចិន ដែលនេះ គឺលឿនជាងផែនការកាលពីឆ្នាំ ២០១៥ របស់លោក ដែលត្រូវការពេល ២ ឆ្នាំ។

លោកបន្ថែមថា អ្នកជំងឺស្ម័គ្រចិត្តលើកដំបូងបង្អស់សម្រាប់ការវះកាត់ដ៏អស្ចារ្យនេះ នឹងជាជនជាតិចិន មិនមែនជាលោក Valery Spiridonov ដែលកើតមានជំងឺពិកាសាច់ដុំដោយសារបញ្ហាខួរឆ្អឹងខ្នងមានឈ្មោះថា Werdnig-Hoffmann Disease ដែលបានស្ម័គ្រចិត្តឱ្យធ្វើការពិសោធន៍លើកមុននោះទេ។

ក្រុមវេជ្ជបណ្ឌិតចិន នឹងដឹកនាំដោយលោក Xiaoping Ren មកពី សកល វិទ្យា ល័យ សុខាភិបាល Harbin អ្នកដែលបានចេញផ្សាយការស្រាវជ្រាវទៅលើការវះកាត់ប្តូរក្បាលសត្វកណ្តុរ ក្នុងឆ្នាំ ២០១៤។

លោក Ren ក៏ជាសមាជិកម្នាក់នៃក្រុមគ្រូពេទ្យដែលបានធ្វើការវះកាត់ប្តូរដៃមនុស្សប្រកបដោយជោគជ័យលើកដំបូង នៅសហរដ្ឋអាមេរិក និងជាសហនិពន្ធជាមួយលោក Canavero ក្នុង អត្ថបទស្រាវជ្រាវមួយឈ្មោះ Surgical Neurology International ចុះផ្សាយក្នុងខែមករា ឆ្នាំ ២០១៦ ផងដែរ។

លោក Canavero អះអាងបន្ថែមថា ខ្លួនបានទទួលជោគជ័យក្នុងការវះកាត់ប្តូរក្បាលរបស់សត្វស្វាមួយក្បាលរួចទៅហើយ ខណ:ក្រុមអ្នកវិទ្យាសាស្រ្តជាច្រើនបានបង្ហាញក្តីកង្វល់ទៅលើក្រមសីលធម៌ផ្សេងៗ។

ដោយឡែក អ្នកសិក្សាផ្នែកក្រមសីលធម៌ជីវសាស្រ្តមកពីសកលវិទ្យាល័យ New York លោក Arthur Caplan បាននិយាយថា បើទោះបីជា Canavero អាចវះកាត់បានប្រកបដោយជោគជ័យក៏ដោយ ក៏គេមិនដឹងថា នឹងមានអ្វីផ្លាស់ប្តូរ និងប៉ះពាល់ដល់រូបរាងកាយដែលត្រូវបានវះកាត់តភ្ជាប់ជាមួយក្បាល និងខួរក្បាលថ្មីនោះទេ៕

ប្រភពព័ត៌មាន: cnet

ចែកចាយបន្ត