Post News Media ព័ត៌មានបច្ចេកវិទ្យា Apple Watch ន...

Apple Watch នាពេលអនាគតនឹងអាចវាស់កម្រិតគ្លុយកូសក្នុងខ្លួនមនុស្ស

ចែកចាយបន្ត

យោងតាមសារព័ត៌មាន BGR បានអះអាងថា ក្រុមហ៊ុន Apple កំពុងខិតខំប្រឹងប្រែងអភិវឌ្ឍបច្ចេកវិជ្ជាតាមដានកម្រិតសារជាតិគ្លុយកូសនៅក្នុងខ្លួនមនុស្ស ដាក់នៅលើនាឡិកាដៃវៃឆ្លាត Apple Watch របស់គេ។ នេះអាចជាដំណឹងល្អ សម្រាប់អ្នកដែលប្រឈមនឹងការកើតជម្ងឺទឹកនោមផ្អែម ដោយពួកគេពុំចាំបាច់ទៅជោះឈាមជាញឹកញាប់ដើម្បីពិនិត្យមើលជម្ងឺទៀតឡើយ។

ប្រភពដដែលលើកឡើងថា ក្រុមហ៊ុនបច្ចេកវិជ្ជាជាន់ខ្ពស់នេះ បានអញ្ជើញវេជ្ជបណ្ឌិតចំនួន ២០០ នាក់មកចូលរួមធ្វើពិសោធន៍ ដើម្បីសម្រេចនូវគម្រោងការ អភិវឌ្ឍបច្ចេកវិជ្ជាថ្មីនៅលើ Apple Watch។

តាមការសិក្សាថ្មីបង្អស់មួយរកឃើញថា អង្គញាណវាស់ចង្វាក់បេះដូងរបស់ Apple Watch អាចពិនិត្យឃើញ ចង្វាក់បេះដូងលោតខុសប្រក្រតី ឬចង្វាក់បេះដូងលោតញាប់ខ្លាំង។ បើយោងតាម នាយកប្រតិបត្តិក្រុមហ៊ុន Apple លោក Tim Cook បានអះអាងថា គាត់ស្រកអស់ជាង ១៣ គីឡូក្រាម តាមរយ:ការប្រើប្រាស់ Apple Watch ដែលកំពុងលក់ដាច់ខ្លាំងនៅលើទីផ្សារ។

ខណ:បច្ចេកវិជ្ជាវាស់ស្ទង់ការលើសជាតិស្ករនេះ គួរឲ្យចាប់អារម្មណ៍ខ្លាំង ឃើញថា ពុំទាន់មានភស្តុតាងណាមួយជាក់លាក់ មកបង្ហាញទៅលើការអភិវឌ្ឍន៍នេះទេ។ មកទល់ពេលនេះ អ្នកនាំពាក្យក្រុមហ៊ុន Apple មិនបានធ្វើការឆ្លើយតបមកវិញចំពោះរបាយការណ៍ចេញផ្សាយមួយនេះឡើយ៕

ប្រភពព័ត៌មាន៖ Mashable.com