Post News Media ព័ត៌មានបច្ចេកវិទ្យា Tim Cook ធ្វើ...

Tim Cook ធ្វើតេស្តឧបករណ៍វាស់សារជាតិគ្លុយកូសក្នុងខ្លួនភ្ជាប់ជាមួយ Apple Watch

ចែកចាយបន្ត

របាយការណ៍ចេញផ្សាយខែមុន បានលើកឡើងថា ក្រុមហ៊ុន Apple បាននឹងកំពុងអភិវឌ្ឍនាឡិកាដៃវៃឆ្លាត Apple Watch ដែលអាចធ្វើរោគវិនិច្ឆ័យជំងឺទឹកនោមផ្អែមបានតាមរយ:អង្គញ្ញាណដែលអាចវាស់ស្ទង់កម្រិតស្ករក្នុងឈាមមនុស្សបាន។ ដោយឡែក នៅថ្ងៃនេះវិញ សារព័ត៌មាន CNBC បានរាយការណ៍មកថា លោក Tim Cook កំពុងតែពាក់សាកល្បងឧបករណ៍តាមដានសារជាតិគ្លុយកូសនៅលើខ្លួនគាត់ផ្ទាល់ ជុំវិញបរិវេណក្រុមហ៊ុន Apple។ ប្រភពដដែលបានបញ្ជាក់ថា ឧបករណ៍ដែលលោកពាក់នោះ តភ្ជាប់ជាមួយនឹង Apple Watch ប៉ុន្តែ ព័ត៌មានលំអិតហាក់ដូចជាមានការស្រពិចស្រពិល។

យោងតាមការព័រណ៌នារបស់សារព័ត៌មាន CNBC ឧបករណ៍ដែលលោក Tim ពាក់នោះ ទំនងជាឧបករណ៍ដាច់ដោយឡែកពីនាឡិកាដៃ Apple Watch និងធ្វើការភ្ជាប់គ្នាតាមរយ:ប្រព័ន្ធ Bluetooth ។

ក្រុមហ៊ុន Apple បានធ្វើការស្រាវជ្រាវទៅលើការគាំពាររោគទឹកនោមផ្អែម ដូចដែលសារព័ត៌មាន BGR បានចេញផ្សាយនៅប៉ុន្មានថ្ងៃមុន។ របាយការណ៍ដដែលនេះបានចង្អុលបង្ហាញថា ក្រុមហ៊ុនបច្ចេកវិទ្យាយក្សអាមេរិក នឹងផលិតចេញនូវកងដៃវៃឆ្លាតហៅថា Smart band ដែលអាចផ្តល់មុខងារបន្ថែមទៅឱ្យនាឡិកាដៃ Apple Watch របស់ខ្លួន។ នេះមានន័យថា ការពិនិត្យសារជាតិគ្លុយកូសនឹងក្លាយជាផ្នែកមួយនៃ Smart bands ដែលអាចធ្វើការបញ្ចូនព័ត៌មាន ឬទិន្នន័យទៅមកជាមួយនឹង Apple Watch នាពេលអនាគតបាន៕

ប្រភព៖ 9to5mac