Post News Media ព័ត៌មានបច្ចេកវិទ្យា គ្រប់យ៉ាងនៅលើ...

គ្រប់យ៉ាងនៅលើ HTC U11 ពេលដឹងហើយអាចនឹងជ្រួលជ្រើម

ចែកចាយបន្ត

HTC U11 មានខ្សែស្រលាយជាមួយនិង HTC U Play និង U Ultra ដែលក្រុមហ៊ុន HTC បានប្រកាសចេញតាំងពីដើមឆ្នាំមក។ ចំពោះទូរស័ព្ទដៃ HTC U11 ឃើញថាទើបតែបង្ហាញវត្តមានមិនទាន់បាន ១ សប្តាហ៍ផង ក៏មានសក្តានុពលខ្លាំងនៅអ៊ឺរ៉ុបទៅហើយ។ ដោយឡែកប្រិយមិត្តមួយចំនួន ហាក់ដូចជា ពុំទាន់បានស្គាល់ច្បាស់គ្រប់យ៉ាងនៅលើវានៅឡើយទេ។

យោងតាមគេហទំព័រស្មាតហ្វូន androidauthority បានធ្វើតេស្តយ៉ាងម៉ត់ចត់ទៅលើ U11 ឃើញថា ទូរស័ព្ទដៃវៃឆ្លាតជំនាន់ក្រោយរបស់ HTC នេះ បានត្រៀមខ្លួនរួចជាស្រេចក្នុងការប្រជែងយកតំណែងកំពូលស្មាតហ្វូនដើរដោយប្រព័ន្ធប្រតិបត្តិ Android។ ដោយសារតែវា ដំណើរការដោយបន្ទះឈីប Snapdragon 835 អមដោយ RAM 4GB/6GB និងអង្គផ្ទុក 64GB/128GB មានកម្លាំងថាមពលទំហំ 3,000 mAh ល្មមគ្រប់គ្រាន់ការប្រើប្រាស់ពេញ ១ ថ្ងៃ។ រីឯ Home-Button ក្រាលដោយបន្ទះស្កេនក្រយៅដៃ និងមានប្រព័ន្ធការពារទឹកជ្រាបក្នុងកម្រិត IP67។

បើលើកអំពីសមត្ថភាពកាមេរ៉ារបស់ U11 វិញ ច្បាស់ណាស់ថា វាពិតជាពិសេសអស្ចារ្យលើសគេ។ ដោយយោងតាមគេហទំព័រ DxOMark ឯកទេសខាងធ្វើតេស្តកាមេរ៉ាស្មាតហ្វូន គួរឲ្យជឿទុកចិត្ត បានធ្វើការវាយតម្លៃ និងផ្តល់ជាពិន្ទុទៅឲ្យ U11 ចំនួន ៩០ ទៅលើការថតរូប និងវីដេអូបានយ៉ាងច្បាស់ដាច់គេ បើប្រៀបនឹងស្មាតហ្វូនផ្សេងៗទៀតនាពេលបច្ចុប្បន្ន។ នេះគឺជាពិន្ទុលំដាប់ខ្ពស់បង្អស់ ឈរលើតារាងចំណាត់ថ្នាក់ប្រចាំគេហទំព័រ DxOMark។ ជាក់ស្តែងវាទទួលបាន ១ ពិន្ទុខ្ពស់ជាង Google Pixel និង ២ ពិន្ទុខ្ពស់ជាង Galaxy S8 និង Sony Xperia X។ នេះដោយសារតែ U11 បំពាក់ដោយកាមេរ៉ាផ្នែកខាងក្រោយទំហំ 12MP ប្រើប្រាស់អង្គញាណ ​BSI បូករួម UltraPixel អាចញែកសាច់រូបភាពបានម៉ត់ល្អ និង UltraSpeed ផ្ចង់លើរូបភាពបានយ៉ាងរហ័ស។ រីឯកាមេរ៉ាមុខវិញមានទំហំ 16MP អាចថតលក្ខណ: HDR បានដោយស្វ័យប្រវត្តិ និងពោរពេញដោយមុខងារថត Selfie ជាច្រើនអនេក។

លើសពីនេះ ទូរស័ព្ទដៃជំនាន់ក្រោយរបស់ HTC នេះ ប្រើប្រាស់នូវប្រព័ន្ធប្រតិបត្តិការ Android 7.1 ភ្ជាប់មកជាមួយ ប្រព័ន្ធបញ្ជាដោយសម្លេងចំនួន ៣ គឺ HTC Sense Companion, Google Assistant និង Amazon Alexa។ ទោះយ៉ាងណា ក្រុមហ៊ុន HTC បានបញ្ជាក់ថា មានតែប្រព័ន្ធ Google Assistant ទេ ដែលប្រសើរជាងគេក្នុងការឆ្លើយតបនិងសំនួរជាច្រើន។

គួរបញ្ជាក់ថា HTC U11 អាចធ្វើការបញ្ជាទិញទុកជាមុនចាប់ពីថ្ងៃនេះតទៅ សម្រាប់តែនៅក្នុងសហរដ្ឋអាមេរិកប៉ុណ្ណោះ នឹងចេញលក់នៅថ្ងៃទី ០៩ ខែ មិថុនា ឆាប់ៗនេះ ជាមួយតម្លៃ ៦៩៦ ដុល្លារសហរដ្ឋអាមេរិក៕

 

ប្រភព៖ androidauthority