Post News Media ព័ត៌មានបច្ចេកវិទ្យា Galaxy S8 ទើប...

Galaxy S8 ទើបតែចេញលក់ក្តៅៗ ស្រាប់តែលេចព័ត៌មាន Galaxy S9 បាត់!

ចែកចាយបន្ត

ខណ:ទូរសព្ទដៃលំដាប់កំពូលរបស់ក្រុមហ៊ុន Samsung គឺ Galaxy S8 និង S8+ ទើបតែចរាចរលក់លើទីផ្សារ ឥឡូវស្រាប់តែប្រព័ន្ធផ្សព្វផ្សាយកូរ៉េមួយឈ្មោះ The Bell រាយការណ៍ថា ជំនាន់បន្ទាប់របស់វា គឺ Galaxy S9 មានកូដសម្គាល់ Star កំពុងឋិតក្នុងដំណើរការអភិវឌ្ឍន៍សម្រេចទៅហើយ។ ដោយឡែក សម្រាប់ម៉ូឌែលអេក្រង់ធំជាង ត្រូវបានគេដាក់កូដសម្គាល់ Star 2 ដែលអាចជា Galaxy S9 Plus។

យោងតាមប្រភពព័ត៌មានដដែល អេក្រង់របស់ម៉ូឌែលបន្ទាប់ទាំងពីរ ប្រើប្រាស់បច្ចេកវិទ្យាអេក្រង់ស្រដៀងទៅនឹង S8 ជំនាន់បច្ចុប្បន្នដែរ ហើយវាទំនងជាមិនមែនជាទូរសព្ទអេក្រង់បត់ដូចព័ត៌មានចចាមអារ៉ាមលើកឡើងកន្លងមកនោះទេ ប៉ុន្តែ វាអាចមានការរចនាឱ្យកាន់តែប្រណិតថែមមួយកម្រិតទៀតជា មួយអេក្រង់ Infinity Display។

Samsung ក៏ត្រូវគេរាយការណ៍ឱ្យដឹងដែរថា ក្រុមហ៊ុននឹងពន្លឿនចង្វាក់ផលិតកម្មនៃគ្រឿងគ្រៅរបស់ទូរសព្ទត្រកូល Galaxy S ស៊េរីឆ្នាំ ២០១៨ នោះ ដូច្នេះ ក្រុមហ៊ុននឹងមានសក្តានុពលគ្រប់គ្រាន់សម្រាប់ប្រកាសចេញ Galaxy S9 មុនពេលធម្មតានៅឆ្នាំក្រោយ។

ដោយឡែក galaxy S9 នឹងប្រើប្រាស់បន្ទះឈីបរបស់ក្រុមហ៊ុន Qualcomm និង CPU ប្រភេទ 7nm ជំនាន់បន្ទាប់របស់ Samsung។ បន្ទះឈីបទាំងពីរ គ្រោងនឹងផលិតចេញក្នុងទ្រង់ទ្រាយដ៏ធំសម្បើមចាប់ពីដើមឆ្នាំ ២០១៨ នៅឯរោងចក្ររបស់ Samsung។

ប្រភពព័ត៌មាន: phonearena