Post News Media ព័ត៌មានបច្ចេកវិទ្យា ទីបំផុត Zucke...

ទីបំផុត Zuckerberg មកទទួលសញ្ញាបត្រពី Harvard ក្រោយបោះបង់ការសិក្សាអស់ ១២ ឆ្នាំ

ចែកចាយបន្ត

កាលពីថ្ងៃព្រហស្បតិ៍ម្សិលមិញ លោក Mark Zuckerberg បានឡើងថ្លែងសុន្ទរកថា ក្នុងពិធីប្រគល់សញ្ញាបត្រឆ្នាំ ២០១៧ នៅឯ Harvard ដែលជាសាកលវិទ្យាល័យដ៏ល្បីល្បាញជាងគេ នៅសហរដ្ឋអាមេរិក ដោយក្នុងនោះលោក ថែមទាំងទទួលបាននូវសញ្ញាបត្របណ្ឌិតកិត្តិយសមួយផងដែរ។

ដូចដែលយើងធ្លាប់បានដឹងហើយថា នាយកប្រតិបត្តិវ័យ ៣៣ ឆ្នាំ ព្រមទាំងជាមហាសេដ្ឋី លេខរៀងទី ៥ នៅលើពិភពលោករូបនេះ បានបោះបង់ចោលការសិក្សាពីសាកលវិទ្យាល័យមួយនេះ អស់រយ:ពេលជាង ១២ ឆ្នាំកន្លងមកហើយ ដើម្បីយកឱកាសនោះ ទៅបង្កើតបណ្តាញទំនាក់ទំនងសង្គមយក្សហ្វេសប៊ុក ដែលបច្ចុប្បន្នក្រុមហ៊ុនរបស់លោកមួយនេះ មានតម្លៃជាទឹកប្រាក់សរុបរហូតដល់ ៤៤៧ កោដិដុល្លារអាមេរិកឯណោះ។

ក្នុងអំឡុងពេលថ្លែងសុន្ទរកថារបស់លោក រយ:ពេលជាង ៣០ នាទី លោកបានផ្ដោតសំខាន់ទៅលើប្រធានបទស្តីពីគោលនយោបាយ ក្នុងនោះក៏មានលើកទ្បើងអំពី បម្រែបម្រួលនៃអាកាសធាតុ, មូលដ្ឋាននៃប្រាក់ចំណូលជាសាកល, កំណែទម្រង់ប្រព័ន្ធយុត្តិធម៌ ព្រមទាំងការធ្វើឲ្យលទ្ធិប្រជាធិបតេយ្យកាន់តែមានភាពប្រសើរទ្បើង ជាមួយនឹងការអនុញ្ញាតឲ្យប្រជាពលរដ្ឋធ្វើការបោះឆ្នោត តាមរយ:បណ្តាញអ៊ិនធើណែត។

លោក Zuckerberg ថែមទាំងបានលើកឡើងផងដែរថា «ដើម្បីអាចផ្លាស់ប្ដូរពិភពលោកបាន គឺត្រូវផ្ដើមចេញពីការផ្លាស់ប្ដូរខ្លួនឯងជាមុនសិន» ។

សូមទស្សនាវីដេអូខាងក្រោម [លោក Mark Zuckerberg ឡើងថ្លែងសុន្ទរកថា]៖