Post News Media ព័ត៌មានបច្ចេកវិទ្យា ចិន ជោគជ័យបាញ...

ចិន ជោគជ័យបាញ់បង្ហោះផ្កាយរណបតារាសាស្រ្តប្រើកាំរស្មី X-ray លើកដំបូងជាប្រវត្តិសាស្រ្ត

ចែកចាយបន្ត

ប្រទេសចិន បានសម្រេចជោគជ័យក្នុងការបាញ់សាកល្បងផ្កាយរណបតារាសាស្រ្តបំពាក់ប្រព័ន្ធកាំរស្មី X-ray ទៅកាន់លំហរអវកាសជាលើកដំបូងបង្អស់របស់ខ្លួន ដើម្បីសិក្សាអាថ៍កំបាំងនៅលើចក្រវាឡ ដូចជារន្ធខ្មៅ ដើមហេតុនៃកាំរស្មីហ្គាមា និងពពួកផ្កាយផាល្សារ (ផ្កាយតូចៗដែលមានកម្លាំងដែនម៉ាញ៉េទិកខ្លាំងមហិមា) ជាដើម។ នេះបើយោងតាមទីភ្នាក់ងារព័ត៌មានរដ្ឋចិន Xinhua ចេញផ្សាយនៅថ្ងៃសុក្រម្សិលមិញ។

ផ្កាយរណបទម្ងន់ ២.៧៦ តោននេះ ត្រូវបានបាញ់ចេញពីជើងទម្រ Long March-4B ឯមជ្ឈមណ្ឌលបាញ់បង្ហោះផ្កាយរណប Jiuquan នៅតំបន់វាលខ្សាច់ Gobi Desert ហើយវានឹងធ្វើដំណើរតាមគន្លងផ្លូវចម្ងាយ ៥៤៧ គីឡូម៉ែត្រពីផ្ទៃផែនដី ក្នុងបេសសកម្មរយ:ពេល ៤ ឆ្នាំ។

តាមរយ:ប្រភពព័ត៌មានដដែល ផ្កាយរណបបំពាក់សុទ្ធតែបច្ចេកវិទ្យាជាន់ខ្ពស់នេះ គឺមានឈ្មោះថា Hard X-ray Modulation Telescope (MXMT) បំពាក់កែវ​យឹតប្រើ​កាំរស្មី X-ray បី ដែលធ្វើឱ្យវាក្លាយជាផ្កាយរណបតារាសាស្រ្តធំ និងខ្លាំងបំផុតរបស់ទីក្រុងប៉េកាំង។

MXMT នឹងធ្វើការស្រាវជ្រាវដែនម៉ាញ៉េទិច ផ្ទៃភពផាល្សារ និងប្រមូលទិន្នន័យព័ត៌មានអំពីបណ្តារន្ធខ្មៅនៅក្នុងចក្រវាឡ។

ប្រធានក្រុមអ្នកវិទ្យាសាស្រ្ត លោក Zhang Shuangnan បានប្រាប់ទីភ្នាក់ងារ Xinhua ថា៖ «យើងកំពុងទន្ទឹងរងចាំមើលរបកគំហើញសកម្មភាពថ្មីៗអំពីរន្ធខ្មៅ និងសិក្សាពីកញ្ចុំផ្កាយណឺតត្រុង ឋិតនៅក្រោមលក្ខខណ្ឌដែន និងទំនាញដ៏មហិមា និងច្បាប់រូបធាតុឋិតក្រោមដែនម៉ាញ៉េទិកដ៏ខ្លាំងក្លា៕

ប្រភពព័ត៌មាន: xinhua

ចែកចាយបន្ត