Post News Media ព័ត៌មានបច្ចេកវិទ្យា Amazon ចាយលុយ...

Amazon ចាយលុយ ១៣.៧$ ប៊ីលាន ទិញយក Whole Foods ដើម្បីពង្រឹកខ្លួនចូលទីផ្សារបន្លែ

ចែកចាយបន្ត

នាថ្ងៃអនាគតខាងមុខ គេអាចនឹងមិនចាំបាច់ដើរផ្សារទិញបន្លែបង្កាសម្រាប់ធ្វើម្ហូបដោយផ្ទាល់ទៀតនោះទេ គឺគ្រាន់តែចុចរើសយកប្រភេទបន្លែត្រីសាច់ ឬគ្រឿងទេសផ្សេងៗតាមទូរសព្ទដៃ ឬកុំព្យូទ៍រ នោះនឹងមានអ្នកដឹកជញ្ជូនមកដល់ផ្ទះឱ្យតែម្តង។ ការសន្និដ្ឋាននេះ គឺធ្វើឡើងបន្ទាប់ពីក្រុមហ៊ុន Amazon ត្រូវគេរាយការណ៍​​ថា បានទិញយកក្រុមហ៊ុនផ្សារបន្លែទំនើបលំដាប់ខ្ពស់មួយឈ្មោះ Whole Foods ជាមួយទឹកប្រាក់ ១៣.៧ ពាន់លានដុល្លារ។

យ៉ាងណាមិញ គេពុំទាន់ទទួលបានព័ត៌មានលម្អិតស្តីពីកិច្ចព្រមព្រៀងតម្លៃពាន់​លាន​​នេះនៅឡើយទេ ប៉ុន្តែ គេអាចប៉ាន់ដឹងថា ក្រុមហ៊ុនផ្សារទំនើបអនឡាញយក្ស​របស់អាមេរិក ចង់ពង្រីកវិសាលភាពរបស់ខ្លួន ចូលទៅក្នុងទីផ្សារលក់រាយតាម​អនឡាញលើមុខទំនិញម្ហូបអាហារ ហើយក្រុមហ៊ុនប្រហែលជាគ្រោងនឹងប្រើប្រាស់ផ្សារបន្លែនេះ ក្នុងចក្ខុវិស័យអាជីវកម្មផ្សេងពីអ្វីដែលផ្សារនោះបាននិងកំពុងប្រតិបត្តិនាពេលបច្ចុប្បន្ន។ ឧទាហរណ៍ អាចប្រើសម្រាប់ទទួលការបញ្ជាទិញបន្លែបង្កាតាមប្រព័ន្ធអនឡាញពីសំណាក់អតិថិជន ជាមួយការផ្តល់សេវាកម្មដឹកជញ្ជូនដល់គេហដ្ឋាន។

តាមការឱ្យដឹងពីក្រុមហ៊ុនទាំងពីរ ម្ចាស់ផ្សារនឹងបន្តបើកដំណើរការផ្សារបន្លែរបស់ខ្លួនក្រោមស្លាក Whole Foods ដដែល។

គួរបញ្ជាក់ថា Whole Foods បានបើកដំណើការអាជីវកម្មរបស់ខ្លួនអស់រយ:ពេលជិត ៤ ទសវត្សន៍មកហើយ។ បច្ចុប្បន្ន ផ្សារបន្លែនេះមិនត្រឹមតែមានសាខាច្រើន​លើសលុបនៅក្នុងទឹកដីសហរដ្ឋអាមេរិកប៉ុណ្ណោះទេ ប៉ុន្តែ ក៏មានដែរនៅក្នុងចក្រ​ភពអង់គ្លេសនូវសាខារបស់ខ្លួនចំនួន ៩ ដោយក្នុងនោះ មាន ៧ ក្នុងទីក្រុង​ឡុងដ៍៕

ប្រភពព័ត៌មាន: theinquirer