Post News Media ព័ត៌មានបច្ចេកវិទ្យា ភាពខុសគ្នាមួយ...

ភាពខុសគ្នាមួយរវាងបុរស និងនារីក្នុងការប្រើបណ្តាញសង្គមដែលការសិក្សាថ្មីរកឃើញ

ចែកចាយបន្ត

បច្ចុប្បន្ន ឯកជនភាពបានក្លាយទៅជារឿងរ៉ាវដែលត្រូវបានបើកចំហរយ៉ាងទូលំទូលាយនៅលើបណ្តាញទំនាក់ទំនងសង្គមដូចជា Facebook និង Twitter ខណ:ទង្វើនេះ ពិតជាអាចនឹងប៉ះពាល់ដល់សន្តិសុខ-សុវត្ថិភាព របស់យើងជាអ្នកប្រើប្រាស់។ តើអ្វីទៅដែលជំរុញចិត្តយើងឱ្យបន្តធ្វើការចែកចាយជីវិតឯកជនទៅកាន់ញាត្តិមិត្ត រួមទាំងមនុស្សចំឡែកៗលើបណ្តាញសង្គម?

ឆ្លើយតបទៅនឹងសំណួរនេះ អ្នកសិក្សាមួយក្រុមមានឈ្មោះថា Olapic បានធ្វើការស្ទាបស្ទង់មតិទៅលើអ្នកប្រើប្រាស់ចំនួន ១០០៣ នាក់ នៅសហរដ្ឋអាមេរិក អំពីទំនាក់ទំនងផ្លូវអារម្មណ៍របស់ពួកគេនៅលើបណ្តាញ​​​សង្គម តាមរយ:សំណួរស្នូល ៣ រួមមាន៖ តើពួកគេមានអារម្មណ៍យ៉ាងណា? តើពួកគេគិតយ៉ាងណា? តើពួកគេបាននិងកំពុងធ្វើអ្វីខ្លះ?។

តាមរយ:លទ្ធផលនៃការធ្វើសម្រង់មតិនេះ ពួកគេបានរកឃើញភាពខុសគ្នាមួយដែលគួរឱ្យចាប់អារម្មណ៍ រវាងអ្នកប្រើប្រាស់បណ្តាញ​​សង្គមជាស្ត្រី និងជាបុរស ដោយក្នុងនោះ ស្ត្រីចង់បានអារម្មណ៍ផ្សារភ្ជាប់ជាមួយមិត្តភក្តិ និងក្រុមគ្រួសារ ឯបុរសចង់បានអារម្មណ៍ឱ្យអ្នកដទៃមានចិត្តច្រណែននឹងខ្លួន ហើយ Like គឺបីដូចជានិម្មិតសញ្ញាមួយតំណាំងឱ្យការឱបបែបឌីជីថលអីចឹង។

ការសិក្សារកឃើញថា ៤២ ភាគរយ នៃអ្នកប្រើប្រាស់ជាស្ត្រីអាយុចាប់ពី ១៤ ទៅ ៤០ ឆ្នាំ ចូលចិត្តបង្ហោះអ្វីៗដែលគាំទ្រឱ្យមានការផ្សារភ្ជាប់ជាមួយមិត្តភក្តិ និងក្រុមគ្រួសារ ធៀបនឹងបុរសដែលមានតែ ២៨ ភាគរយចំពោះការដែលចង់ឱ្យមានអារម្មណ៍បែបនេះ។ ដោយឡែក បុរសភេទវិញ គឺទំនងជាចូលចិត្តបង្ហោះអ្វីៗដែលធ្វើឱ្យគេឯងច្រណែននឹងខ្លួន ជាងស្ត្រី ទោះបីជាអ្នកប្រើប្រាស់ដែលគិតដូច្នោះ ត្រូវគេរកឃើញថា គឺមានតែ ៨ ភាគរយ ប៉ុណ្ណោះ៕

សម្រាប់ព័ត៌មានបន្ថែមស្តីពីរបាយការណ៍លទ្ធផលនៃការសិក្សា ប្រិយមិត្តអាចចុចចូលអានបន្ថែមតាមតំណភ្ជាប់នេះ៖
https://www.scribd.com/presentation/351845454/Psych-of-Sharing-US-Stats-New#download

ប្រភពព័ត៌មាន: thenextweb