Post News Media ព័ត៌មានបច្ចេកវិទ្យា គ្រប់គ្នាជិតប...

គ្រប់គ្នាជិតបានជិះរថយន្តស្វ័យបើកបររបស់ Nissan ហើយ!

ចែកចាយបន្ត

ក្នុងរយ:កាលប៉ុន្មានឆ្នាំចុងក្រោយនេះ ក្រុមហ៊ុនផលិតរថយន្តលើលោក បាននិង​កំពុងប្រឹងប្រែងប្រកួតប្រជែងគ្នាអភិវឌ្ឍបច្ចេកវិទ្យាស្វ័យបើកបរសម្រាប់បំពាក់លើផលិតផលរថយន្តម៉ូឌែលក្រោយៗរបស់ខ្លួនយ៉ាងខ្លាំង ក្នុងនោះក៏មានក្រុមហ៊ុន Nissan ផងដែរ។

ក្រុមហ៊ុនផលិតរថយន្តលំដាប់ពិភពលោករបស់ជប៉ុនមួយនេះ ទើបបាន​រំលេច​ឱ្យ​ឃើញនូវជំនួយការបើកបរស្វ័យប្រវត្តិលើកដំបូងរបស់ខ្លួនមានឈ្មោះថា ProPilot ជំនាន់ទីមួយ សម្រាប់រថយន្តត្រកូល Leaf EV ជំនាន់បន្ទាប់របស់ខ្លួន ផលិត​ចេញ​​លក់នៅអាមេរិកខាងជើង និងអឺរ៉ុប។
ប្រព័ន្ធស្វ័យបើកបរថ្មីរបស់ក្រុមហ៊ុននេះ អាចចុចឱ្យដំណើរការបានភ្លាមៗ តាម​រយ:​ប៊ូតុងមួយរចនាឡើងនៅលើដៃចង្កូតរបស់រថយន្ត ហើយនៅ​ពេលបើក​ដំណើរ​ការ វាអាចគ្រប់គ្រងដៃចង្កូត ហ្រ្វាំង និងល្បឿនរបស់រថយន្តបាន​ ប៉ុន្តែ បាន​តែ​នៅ​លើផ្លូវឯកទិសប៉ុណ្ណោះ។

ក្នុងនោះដែរ អ្នកបើកបរនឹងអាចឃើញស្ថានភាពចំពោះ​មុខតាមរយ:អេក្រង់ព័័ត៌​មានបង្ហាញជារូបភាពក្រាហ្វិកឌីជីថលលើតាប្ល៊ូរបស់រថយន្ត ពីក្រោយដៃចង្កូត។
ទោះបីជាប្រព័ន្ធថ្មីនេះ មិនទាន់អាចធៀបផ្ទឹមនឹង​ប្រព័ន្ធស្វ័យបើកបរ​ដែលទំនើប​បំផុត​របស់ក្រុមហ៊ុនផលិតរថយន្ត Tesla ដែលអាចផ្លាស់ប្តូរខ្សែផ្លូវរថ ចាប់​ល្បឿន​ចរាចរ ចូលចត និងចាប់ហ្វ្រាំងពេលជួបអាសន្នដោយខ្លួនឯងក៏ដោយ ក៏វាអាច​ជួយគ្រប់គ្រងដៃចង្កូតជំនួសអ្នកបើកបរលើផ្លូវក្រៅក្រុងផងដែរ។

ម្យ៉ាងទៀត ក្រុមហ៊ុន Nissan បានសន្យាថា ខ្លួននឹងផ្តល់នូវប្រព័ន្ធស្វ័យ​បើកបរ​ដែលកាន់តែទំនើបជាងនេះថែមទៀត នៅឆ្នាំបន្តបន្ទាប់ ដែលវានឹងអាចបញ្ជា​យានយន្តជំនួសអ្នកបើកបរលើដងវិថីខ្វាត់ខ្វែងក្នុងទីក្រុងបាន។

គួរបញ្ជាក់ថា រថយន្ត Nissan Leaf EV ម៉ូឌែលថ្មី ដែលនឹងបំពាក់ប្រព័ន្ធ ProPilot នេះ ត្រូវគេរំពឹងថា នឹងបង្ហាញខ្លួនក្នុងខែកញ្ញា ហើយនឹងចេញលក់​នៅបំណាច់ឆ្នាំ ជាមួយការបំពាក់អាគុយកម្លាំង ៦០ គីឡូវ៉ាត់ អាចបើកបរ​បាន​ចម្ងាយជាង ៣០០ គីឡូម៉ែត្រ បន្ទាប់ពីសាកបំពេញថាមពលថ្មម្តងៗ ដែលនេះ គឺខ្លាំងជាងម៉ូឌែលបច្ចុប្បន្នទ្វេដង៕

អត្តបទ: សេង, ប្រភពព័ត៌មាន: engadget