Post News Media ព័ត៌មានបច្ចេកវិទ្យា Apple ទិញក្រុ...

Apple ទិញក្រុមហ៊ុនអាល្លឺម៉ង់ឯកទេសខាងបច្ចេកវិទ្យា AR និង Eye-Tracking

ចែកចាយបន្ត

ក្រុមហ៊ុន Apple នៅថ្ងៃអង្គារនេះ បានទទួលស្គាល់ថា ខ្លួនបានទិញយកក្រុមហ៊ុនឯកទេសខាងបច្ចេកវិទ្យា AR (Augmented Reality) និងប្រព័ន្ធតាមសម្គាល់ប្រស្រីភ្នែកមនុស្សរបស់ក្រុមហ៊ុនអាល្លឺម៉ង់មួយឈ្មោះ SensoMotoric Intruments។ នេះបើយោងតាមរបាយការណ៍ពីគេហទំព័រព័ត៌មាន Axios។

ក្រុមហ៊ុនដែលបានបង្កើតឡើងនៅក្នុងឆ្នាំ ១៩៩១ និងមានមូលដ្ឋានក្នុងទីក្រុង Teltow ប្រទេសអាល្លឺម៉ង់ បានធ្វើការអភិវឌ្ឍបច្ចកវិទ្យាចាប់ចលនាប្រស្រីភ្នែកសម្រាប់យកទៅបំពាក់ជាមួយវ៉ែនតា និងឧបករណ៍ AR ហើយវានឹងជួយឱ្យ Apple បង្កើនការផ្តោតទៅលើគ្រោងការបង្កើតកម្មវិធី AR សម្រាប់ចក្ខុវិស័យក្នុងការបង្កើត iPhone ឬយកវាទៅបំពាក់លើឧបករណ៍ឯករាជ្យណាមួយរបស់ខ្លួន នាថ្ងៃអនាគត។

ក្រុមហ៊ុនបច្ចេកវិទ្យាយក្សអាមេរិក មិនបានប្រកាសអំពីព័ត៌មាននេះជាផ្លូវការនោះទេ ខណ:ខ្លួនពុំមានទម្លាប់ប្រកូកប្រកាសឱ្យសាធារណជនដឹងឮអំពីការទិញយកក្រុមហ៊ុននេះក្រុមហ៊ុននោះពីមុនមក។ ទោះយ៉ាងណា ក្រុមហ៊ុនផលិត iPhone តែងបង្ហើបប្រាប់តាមរយ:អ្នកសារព័ត៌មានអំពីការទិញដូរផ្សេងៗរបស់ខ្លួន ជាក់ស្តែង ដូចជាពេលនេះអីចឹង។

គេពុំដឹងច្បាស់ថា Apple ទិញយកបច្ចេកវិទ្យា AR និង Eye-tracking ពីក្រុមហ៊ុន SensoMotoric Intruments ក្នុងគោលបំណងអ្វីនោះទេ ប៉ុន្តែ កន្លងមក លោក Tim Cook ដែលជានាយកប្រតិបត្តិរបស់ក្រុមហ៊ុន បានបញ្ចាក់នៅក្នុងកិច្ចសម្ភាស៍កន្លងមកថា គាត់គិតថា AR គឺបច្ចេកវិទ្យាដ៏មានឥទ្ធិពលយ៉ាងធំសម្បើមដែលកំពុងរីកចម្រើនមួយ។

ដោយឡែក នៅឯសមាជ WWDC ដើមខែមុន Apple ក៏បានប្រកាសចេញកម្ម​វិធី ARKit ថ្មីរបស់ខ្លួនដើម្បីបើកឱ្យក្រុមអ្នកអភិវឌ្ឍកម្មវិធីបង្កើតកម្មវិធីថ្មីៗ ទាញយកប្រយោជន៍ពីអង្គចាប់សញ្ញា និងកាមេរ៉ារបស់ iPhone ដើម្បីអាចសម្គាល់​ទីជម្រៅ និងដាក់វត្ថុនិមិ្មតនៅលើទីតាំងពិតជាក់ស្តែង៕

ប្រែសម្រួល: សេង, ប្រភពព័ត៌មាន: theverge