Post News Media ព័ត៌មានបច្ចេកវិទ្យា iPhone 8 គ្មា...

iPhone 8 គ្មានឡើយ Touch ID ក្រោមអេក្រង់ តែមានបច្ចេកវិទ្យាថ្មីមកជំនួស: របាយការណ៍ថ្មី

ចែកចាយបន្ត

កំពូលទូរសព្ទដៃ iPhone 8 ដែលគេជឿថា នឹងមកដល់ឆាប់ៗខាងមុខ ប្រហែលជាពុំមានបន្ទះស្កេនក្រយៅដៃ ឬ Touch ID បំពាក់ក្រោមអេក្រង់ សម្រាប់ដោះ​សោចូលទៅកាន់កម្មវិធីទូរសព្ទ ដូចព័ត៌មានចចាមអារ៉ាមលើកឡើងកន្លងមកនោះទេ ប៉ុន្តែ វានឹងជំនួសមកវិញដោយបច្ចេកវិទ្យាស្កេនមុខ 3D ដ៏អស្ចារ្យថ្មីមួយ។

អំណះអំណាងនេះ ត្រូវបានលើកឡើងក្នុងរបាយការណ៍ចុងក្រោយបង្អស់មួយរបស់ លោក Ming-Chi Kuo និងត្រូវបានសារព័ត៌មាន Bloomberg និង KGI Securities ស្រង់មកចុះផ្សាយ។

លោក Kuo អះអាងថា ទូរសព្ទដៃ iPhone ដែលនឹងបំពាក់អេក្រង់ OLED ផលិតឡើងដោយក្រុមហ៊ុន Samsung និងដែលពិភពលោកកំពុងទន្ទឹងរងចាំ ច្បាស់ជានឹងមិនមានការបំពាក់បន្ទះស្កេនក្រយៅដៃអ្វីទាំងអស់។

អ្នកទម្លាយព័ត៌មានសម្ងាត់ក្រុមហ៊ុនផលិតទូរសព្ទដ៏ល្បីល្បាញរូបនេះ បន្ថែមថា អវត្តមានបច្ចេកវិទ្យាសន្តិសុខថ្មីនោះ គឺដោយសារតែក្រុមហ៊ុន Apple រហូតមកទល់ពេលនេះ ពុំអាចរកវិធីសៀតបញ្ចូលអង្គញាណសម្គាល់ក្រយៅដៃក្រោមស្រទាប់កញ្ចក់អេក្រង់ OLED នៅឡើយទេ ខណ:ក្រុមហ៊ុន Vivo និង​ Qualcomm បានធ្វើវាបានដោយជោគជ័យ និងលើកយកបង្ហាញរួចទៅហើយកាលពីសប្តាហ៍មុន ពោលគឺ ទម្រង់រចនាបទថ្មីនេះ គឺមានលក្ខណ:ស្មុគស្មាញពេកសម្រាប់ក្រុមហ៊ុនយក្សអាមេរិក។

ដោយសារឧបសគ្គនេះហើយ លោក Kuo ហ៊ាននិយាយថា Apple នឹងជ្រើសរើស​យក​បច្ចេកវិទ្យាសម្គាល់ផ្ទៃមុខក្នុងទម្រង់ 3D មកជំនួសវិញ ដោយសារតែទីមួយ វាអាចជួយបង្កើនប្រព័ន្ធសុវត្ថិភាពលើទូរសព្ទ និងទីពីរ វាអាចជួយបង្កើនកម្រិតគុណ​ភាពថតរូបបែប Selfie។

យោងតាមរបាយការណ៍ចុះផ្សាយលើគេហទំព័រ Bloomberg អង្គញាណសម្គាល់ផ្ទៃមុខ 3D ថ្មីរបស់ក្រុមហ៊ុន Apple មានល្បឿនដំណើរការលឿនរហូតដល់រាប់រយមីល្លីវិនាទី និងអាចសម្គាល់ផ្ទៃមុខមនុស្សបានបើទោះជាវាដាក់នៅលើតុក៏ដោយ។ ដូច្នេះ លទ្ធភាពនៃការជ្រើសរើសបច្ចេកវិទ្យានេះ ជំនួសការបំពាក់ Touch ID ពីក្រោមស្រទាប់អេក្រង់មុខរបស់ iPhone 8 អាចនឹងមានកម្រិតខ្ពស់។

គួររំឭកថា កាលពីដើមឆ្នាំ​ គេហទំព័រ Mac Rumors បានអះអាងថា ខ្លួនទទួលបានប្រភព និងប៉ាតង់ដែលបញ្ជាក់ថា iPhone 8 នឹងចេញមកជាមួយមុខងារ​ស្គេនប្រស្រីភ្នែក ឬសម្គាល់ផ្ទៃមុខ សម្រាប់បង្កើនសន្តិសុខទិន្នន័យទូរសព្ទ ខណ:​អ្នកប្រើប្រាស់កាន់តែច្រើនឡើង បង្ហាញក្តីកង្វល់លើមុខងារ Touch ID របស់ Apple។

ទោះយ៉ាងណា​ ការពិតឬយ៉ាងណានោះ Post Tech នឹងធ្វើការចុះផ្សាយបន្តឱ្យប្រិយមិត្តបានជ្រាបនៅពេលក្រោយទៀត៕

ប្រភពព័ត៌មាន: mashable