Post News Media ព័ត៌មានបច្ចេកវិទ្យា គូប្រជែងថ្មីរ...

គូប្រជែងថ្មីរបស់ iPhone 8 និង​ Galaxy S8 នឹងចេញមកបង្អួតសមត្ថភាពថ្ងៃទី ២៥ សីហា

ចែកចាយបន្ត

ស្មាតហ្វូនលំដាប់កំពូល រចនាបទយ៉ាងល្អប្រណិត និងផលិតឡើងដោយក្រុមហ៊ុន Essential ដឹកនាំដោយស្ថាប​និកប្រព័ន្ធប្រតិបត្តិការ Android គឺលោក Any Robin នឹងតាំងបង្ហាញជាផ្លូវការនៅឯព្រឹត្តិការណ៍មួយឈ្មោះ “First Look” នាថ្ងៃទី ២៥ សីហា បន្ទាប់ពីវា ត្រូវបានប្រកាសចេញកាលពីចុងខែឧសភា

ទោះបីជាកន្លងមក លោក Rubin បានសន្យាថា ស្មាតហ្វូនម៉ូឌែលដំបូងរបស់ខ្លួន នឹងចែកចាយលក់នៅលើទីផ្សារក្រោយការប្រកាសចេញមួយ ឬពីរសប្តាហ៍ក៏ដោយ ក៏រហូតមកទល់ពេលនេះ គេពុំទាន់ឃើញវត្តមានរបស់វាដាក់លក់សម្រាប់មហាជននៅឡើយ។
ទោះយ៉ាងណា នៅប៉ុន្មានថ្ងៃមុននេះ បុគ្គលិកក្រុមហ៊ុន បានគូសបញ្ជាក់ថា ស្មាតហ្វូនរបស់ពួកគេកំពុងឋិតក្នុងដំណើរការផលិតទ្រង់ទ្រាយធំហើយ ហើយថា ពួកគេគ្រោងនឹងប្រកាសថានៅពេលណាវាចេញលក់ នៅសប្តាហ៍ក្រោយ។

យោងតាមប្រភពព័ត៌មានពី Phone Arena ស្មាតហ្វូនដ៏ទំនើបម៉ាកថ្មីដែលមានសមត្ថភាពកប់ស៊េរី មិនចាញ់កំពូលស្មាតហ្វូនរបស់ក្រុមហ៊ុន Apple និង Samsung មួយម៉ូឌែលនេះ នឹងបង្ហាញវត្តមាននៅក្នុងព្រឹត្តិការណ៍​ “First Look” ថ្ងៃទី ២៥ សីហា នាទីក្រុង Los Angeles សហរដ្ឋអាមេរិក ហើយក្នុងឱកាសនោះ អ្នកចូលរួមអាចមើល និងធ្វើការតេស្តប្រើប្រាស់សាកល្បងបាន។

ដោយឡែក គេពុំដឹងច្បាស់ទេថា តើក្រុមហ៊ុនបានអញ្ជើញភ្ញៀវពីមជ្ឈដ្ឋានណាឱ្យទៅចូលរួមនៅឡើយទេ ខណ:ប្រព័ន្ធផ្សព្វផ្សាយហាក់មិនទាន់បានទទួលលិខិតនោះនៅឡើយ ដែលនេះអាចឱ្យគេទាញការសន្និដ្ឋានបានថា ព្រឹត្តិការណ៍តាំងបង្ហាញនោះ គឺរៀបចំឡើងសម្រាប់តែអតិថិជនប៉ុណ្ណោះ៕

ប្រភពព័ត៌មាន: Droid-life