Post News Media ព័ត៌មានបច្ចេកវិទ្យា ឆាប់ៗនេះ Sams...

ឆាប់ៗនេះ Samsung អាចនឹងចេញនាឡិកាដៃកូនកាត់ឈ្មោះ Gear Sport

ចែកចាយបន្ត

ក្រុមហ៊ុន Samsung បានគូសបញ្ជាក់កាលពីជិតពីរសប្តាហ៍មុនថា ខ្លួនកំពុងធ្វើការនៅលើឧបករណ៍បំពាក់ជាប់ខ្លួនថ្មីមួយទៀត ដែលវាគឺមិនមែនដូចជា SmartWatch ឬ SmartBand ទាំងស្រុងនោះទេ។

ក្រុមហ៊ុនកូរ៉េខាងត្បូង បានផ្ញើសារអេឡិចត្រូនិកទៅកាន់សមាជិកកម្មវិធី SmartLab Plus មួយចំនួន ដើម្បីស្វែករកគំនិតយោបល់របស់ពួកគេ អំពីវិធីសាស្រ្តក្នុងការផ្សព្វផ្សាយនាឡិកាដៃបច្ចេកវិទ្យាកូនកាត់ស៊េរីថ្មីរបស់ខ្លួន ដែលគ្រោងនឹងប្រកាសចេញឆាប់ៗខាងមុខ។

ព័ត៌មានដែលត្រូវបានគេទម្លាយតាមប្រព័ន្ធអនឡាញនេះ បានឱ្យដឹងបន្ថែមទៀតថា នាឡិកាដៃទំនើបម៉ូឌែលថ្មី ដែលទើបកត់បញ្ចូលក្នុងបញ្ជីរបស់គណកម្មការទំនាក់ទំនងសហព័ន្ធ FCC (Federal Communications Commission) ត្រូវបាន Samsung ដាក់ឈ្មោះឱ្យថា Gear Sport hybrid។ ដោយឡែក ចំពោះលក្ខណ:​សម្បត្តិ​ផ្សេងៗរបស់វា មិនទាន់ត្រូវបានបើកបង្ហាញនៅឡើយ។

បើតាមរូបភាពដែលបានបង្ហាញ Gear Sport គឺមានមុខមូល ស្រដៀងទៅនឹងនាឡិកាដៃ Galaxy Gear របស់ Samsung ស៊េរីបច្ចុប្បន្នអីចឹងដែរ តែទោះយ៉ាងណា បើតាមឈ្មោះរបស់វា បូកបន្ថែមការអះអាងរបស់ក្រុមហ៊ុនកន្លងមក សបញ្ជាក់ថា នាឡិកាដៃស៊េរីថ្មីនោះ គឺឋិតនៅចន្លោះរវាង SmartWatch និង SmartBand។

ថ្វីត្បិតតែ Samsung ពុំបានប្រាប់ថា Gear Sport កូនកាត់នឹងប្រកាសចេញពេលណាក៏ដោយ ក៏គេជឿថា ព្រឹត្តិការណ៍​ IFA 2017 នៅខែក្រោយ គឺជាពេលវេលាដ៏វិសេសវិសាលបំផុតមួយសម្រាប់ក្រុមហ៊ុន ក្នុងការបញ្ចេញសមិទ្ធផលថ្មីៗរបស់ខ្លួនបង្អួតពិភពលោក៕

ប្រភពព័ត៌មាន: FCC via Phandroid