Post News Media ព័ត៌មានបច្ចេកវិទ្យា អ្នកជំនាញរកឃើ...

អ្នកជំនាញរកឃើញថា iOS 11 ពិតជាស៊ីថ្មខ្លាំងជាង iOS 10 មែន!

ចែកចាយបន្ត

ប្រព័ន្ធប្រតិបត្តិការ iOS 11 ពិតជាបានពាំនាំមកជាមួយលក្ខណ:សម្បតិ្តថ្មីៗគួរឱ្យចាប់អារម្មណ៍ជាច្រើន​ក៏ពិតមែន ប៉ុន្តែ វាក៏បានភ្ជាប់មកជាមួយបញ្ហាគួរឱ្យឈើក្បាលខ្លះដែរ។ ដោយមិនខុសពីពេលចេញប្រព័ន្ធប្រតិបត្តិការជំនាន់ថ្មីលើកដំបូងម្តងៗ បញ្ហាថាមពលថ្មឆាប់ស្រកអស់ តែងត្រូវបានអ្នកប្រើប្រាស់ជាច្រើន​រអ៊ូរទាំជាញឹកញាប់​។

ទោះយ៉ាងណា ក្រោយពេល Apple ចេញកំណែសំខាន់ថ្មីៗបន្ថែម បញ្ហាដ៏សាមញ្ញ​បំផុតនេះ ក៏ត្រូវបានដោះស្រាយជាបណ្តើរៗផងដែរ។

ពាក់ព័ន្ធនឹងបញ្ហានេះ ក្រុមហ៊ុនស្រាវជ្រាវសន្តិសុខប្រព័ន្ធបច្ចេកវិទ្យា Wandera បានធ្វើការស្ទាប់ស្ទង់មួយ ដោយប្រៀបធៀបអ្នកប្រើប្រាស់ iPhone និង iPad រវាងដើរដោយប្រព័ន្ធ iOS 10 និង iOS 11 នៅលើបណ្តាញរបស់ខ្លួនចំនួន ៥០,០០០ នាក់ ហើយកត់ត្រាទុក និងធ្វើមធ្យមភាគនៃស្រកចុះថាមពលថ្មឧបករណ៍របស់ពួកគេក្នុងរយ:ពេល ៣ ថ្ងៃ។

ដោយសន្មតថាថ្ម iPhone ឬ iPad នីមួយៗ ប្រើចាប់ពី ១០០% រហូតដល់ ០% គេបានរកឃើញថា កម្រិតស៊ីថ្មលើ iDevices ប្រើ iOS 11 ឈរនៅ ៩៦ នាទី ឆាប់​​អស់ជាងខ្លាំងធៀបទៅនឹង iOS 11 ដែលឈរនៅ ២៤០​ នាទី។

ប្រាកដណាស់ លទ្ធផលអាចមានភាពលម្អៀងដោយសារតែ iPhone និង iPad មានជំនាន់ថ្មីចាស់ និងប្រើច្រើនឬតិច ប៉ុន្តែ វាបានបង្ហាញពីបញ្ហាដែលមិនអាចប្រកែកបានមួយគឺ iOS 11 វាស៊ីថ្មខ្លាំងជាង iOS 10 បន្ទាប់ពីអ្នកប្រើប្រាស់ Update រួច។

គួរបញ្ជាក់ថា ក្រុមហ៊ុនបានដាក់ចេញនូវកំណែតូចមួយគឺ iOS 11.0.1 បន្ទាប់ពី iOS 11 ដំបូង ត្រូវបានបើកឱ្យទាញមួយសប្តាហ៍។ ប៉ុន្តែ វាហាក់ដូចជាមិនបាន​ជួយដោះស្រាយបញ្ហាថ្មច្រើននោះទេ។

ដូច្នេះ ប្រសិនបើនៅប្រើ iOS 10 នៅឡើយ លោកអ្នកគួរតែរង់ចាំដល់ Apple ចេញកំណែធំមួយសិនទៅ។ បើតាមការសម្គាល់ បញ្ហាថ្មច្រើនត្រូវបានដោះស្រាយតាមរយ:កំណែ iOS XX.1៕

ក្រោយឡើង iOS 11 រួច ថ្ម iPhone អ្នកចេះតែឆាប់អស់? មានវិធីមួយអាចជុសជុលបាន ប៉ុន្តែ..

ប្រភពព័ត៌មាន: WanderaNeowin