Post News Media ព័ត៌មានបច្ចេកវិទ្យា ព្រលានយន្តហោះ...

ព្រលានយន្តហោះឌូប៉ៃ ដាក់សាកល្បងច្រកនិម្មិតសម្រាប់ស្គេនមុខអ្នកដំណើរ

ចែកចាយបន្ត

ដើម្បីបង្កើនភាពងាយស្រួល និងសន្តិសុខសុវត្ថិភាពនៅអាកាសយានដ្ឋានអន្តរ​ជាតិ​របស់ខ្លួន ក្រុមហ៊ុនអាកាសចរណ៍ឌូប៉ៃ បានដាក់សាកល្បងនូវគំរូច្រកផ្លូវសន្តិសុខថ្មីមួយដ៏ទំនើប សម្រាប់ស្កេនមុខអ្នកដំណើរចូលមកកាន់ប្រទេសរបស់ខ្លួន ដែល​វាមានសណ្ឋានដូចជារោងផ្លូវមួយអីចឹង។
យោងតាមរបាយការណ៍ពីកាសែត The National ច្រកឆែកឆេរនោះ មានបំពាក់បច្ចេកវិទ្យារូបភាពនិម្មិត និងកាមេរ៉ារហូតដល់ ៨០ គ្រឿង ដែលអាចស្កេនផ្ទៃមុខ រួមទាំងប្រស្រីភ្នែកអ្នកដំណើរ នៅពេលពួកគេដើរឆ្លងកាត់បាន។

អ្វីដែលគួរឱ្យចាប់អារម្មណ៍ជាងនេះនោះគឺ រូបភាពនិម្មិតដែលរំលេចឡើងនៅអមសងខាងច្រកផ្លូវ អាចមានការផ្លាស់ប្តូរទៅជាទស្សភាពផ្សេងៗ ដូចជាសមុទ្រខ្សាច់ ឬការផ្សព្វផ្សាយពាណិជ្ជកម្មចុះឡើងបាន។ ម្យ៉ាងទៀត នៅពេលអ្នកដំណើរដើរដល់មាត់ផ្លូវចេញ ពួកគេនឹងឃើញសារមួយដាក់ថា “សូមឱ្យមានដំណើរកម្សាន្តដ៏ល្អមួយ” ឬទទួលបានសញ្ញាពណ៌ក្រហមប្រាប់ឱ្យដឹងពីបញ្ហាសន្តិសុខ។

ច្រកផ្លូវនេះដែរ មិនត្រឹមតែបង្កប់បច្ចេកវិទ្យាស្គេនមុខប៉ុណ្ណោះទេ ប៉ុន្តែ វាក៏ទាក់​ទាញឱ្យអ្នកដំណើរងាកមើលទិដ្ឋភាពនិម្មិតជុំវិញខ្លួន ដែលជួយសម្រួលឱ្យកាមេរ៉ាអាចថតស្គេនផ្ទៃមុខរបស់ពួកគេបានកាន់តែច្បាស់លាស់ផងដែរ។

គម្រោងដំឡើងច្រកផ្លូវពិសេសនេះ គឺធ្វើឡើងដោយមានកិច្ចសហការរួមគ្នាជាមួយក្រុមហ៊ុនអាកាសចរណ៍ Emirates ហើយវានឹងដាក់ឱ្យដំណើរការជាលើកដំបូងនៅច្រកផ្លូវលេខ ៣ នារដូវក្តៅឆ្នាំ ២០១៨ រួចនឹងដំឡើងបន្ថែមនៅច្រកដទៃផ្សេងទៀត និងជាបន្តបន្ទាប់រហូតដល់ឆ្នាំ ២០២០។

សម្រាប់គោលគំនិតក្នុងការប្រើប្រាស់បច្ចេកវិទ្យាស្គេនមុខតាមមធ្យោបាយថ្មីនេះ កើតឡើងបន្ទាប់ពីគេមើលឃើញថា ចំនួនអ្នកដំណើរទៅកាន់ទីក្រុងឌូប៉ៃមានការកើនឡើងជារៀងរាល់ឆ្នាំ ហើយបើតាមការប៉ាន់ប្រមាណ​ នៅឆ្នាំ ២០២០ នឹងមានអ្នកដំណើរ ១២៤ លាននាក់ ឆ្លងកាត់តាមអាកាសយានដ្ឋាននានាក្នុងទីក្រុងនៃប្រទេសអារ៉ាបីសាអូឌីតមួយនេះ៕

ប្រភពព័ត៌មាន: theverge