Post News Media ព័ត៌មានបច្ចេកវិទ្យា Facebook ប្រក...

Facebook ប្រកាសចេញវ៉ែនតា VR ដ៏ពិសេស មិនត្រូវការកុំព្យូទ័រ ឬទូរសព្ទ

ចែកចាយបន្ត

សហរដ្ឋអាមេរិក: កាលពីយប់ម្សិលមិញ តាមរយ:វេទិកា Oculus Connect លើកទី ៤ ដែលប្រព្រឹត្តទៅនាទីក្រុង San Jose ក្រុមហ៊ុន Facebook បានប្រកាសចេញវ៉ែនតាបច្ចេកវិទ្យា VR ដ៏ថ្មីស្រឡាងមួយ មានឈ្មោះថា Oculus Go ដែលមិនចាំបាច់ត្រូវការប្រើភ្ជាប់ជាមួយកុំព្យូទ័រ ឬទូរសព្ទដៃ ដូចវ៉ែនតា VR ដទៃផ្សេងទៀតនៅលើទីផ្សារបច្ចុប្បន្នឡើយ។

យោងតាមអនុប្រធានក្រុមហ៊ុន Oculus VR គឺលោក Hugo barra បានឱ្យដឹងថា Oculus Go ត្រូវបានរច​នា​​ឡើងជាមួយសរសៃក្រណាត់ម្យ៉ាងទន់ល្មើយ ដែលជួយឱ្យវ៉ែនតានេះ មានទម្ងន់ស្រាលខ្លាំង និងផ្តល់ផាសុកភាពនៅពេលពាក់ជាប់នៅលើផ្ទៃមុខ។

លោក Barra បានសរសេរនៅក្នុងប្លុកមួយថា វ៉ែនតា VR ស៊េរីដំបូងរបស់ក្រុមហ៊ុន Facebook នេះ បំពាក់អេក្រង់ LCD ប្រើបច្ចេកវិទ្យា Fast-Switching អាចបញ្ចាំងរូបភាពកម្រិត ២៥៦០x១៤៤០ ភិចសែល រន្ធស៊កកាស ៣.៥ មីល្លីម៉ែត្រ ភ្ជាប់មកជាមួយឧបករណ៍បំពងសំឡេងពិសេស មានដៃបញ្ជាឥតខ្សែមួយ។

នៅក្នុងវេទិកា Oculus Connect លើកទី៤ នេះដែរ ប្រធានក្រុមហ៊ុន Facebook លោក Mark Zuckerberg បានថ្លែងថា «យើងចង់ឱ្យមនុស្សមួយពាន់លាននាក់ចូលទៅក្នុងពិភពប្រចក្សនិម្មិត VR»។

ជាមួយគ្នានោះដែរ លោក Barra ដែលទើបបោះបង់តួនាទីជាប្រមុខដឹកនាំអន្តរជាតិនៅឯក្រុមហ៊ុនផលិតស្មាត ហ្វូន Xiaomi របស់ចិន កាលពីដើមឆ្នាំ បន្ថែមថា៖ «យើងជឿថា វ៉ែនតាថ្មីនេះ នឹងផ្តល់នូវមធ្យោបាយងាយស្រួលបំផុតមិនធ្លាប់មានក្នុងការចូលទៅកាន់ពិភព VR»។

តាមការប្រកាសរបស់ក្រុមហ៊ុន វ៉ែនតា Oculus Go នឹងចាប់ផ្តើមចែកចាយលក់នៅលើទីផ្សារនៅដើមឆ្នាំ ២០១៨ ជាមួយតម្លៃលក់ប្រមាណ ១៩៩ ដុល្លារ (តម្លៃបរទេស)៕

ប្រភពព័ត៌មាន: msn