Post News Media ព័ត៌មានបច្ចេកវិទ្យា អ្នកប្រើ Gala...

អ្នកប្រើ Galaxy S8, Note 8 អាចដកប៊ូតុង Bixby ចោលទាំងស្រុងបានហើយ នៅពេលនេះ!

ចែកចាយបន្ត
នឹងលែងមានប៊ូតុង Power ទីពីរទៀតហើយ!

Bixby គឺជាជំនួយការសំឡេងឌីជីថលដ៏វៃឆ្លាតមួយដែលអភិវឌ្ឍឡើងដោយក្រុមហ៊ុន Samsung និងដែលទើបដាក់ចេញសម្រាប់ស្មាតហ្វូនត្រកូល Galaxy S និង Note ជំនាន់ចុងក្រោយ ដែលរួមមាន Galaxy S8, S8 Plus, និង Note 8 បន្ទាប់ពីអ្នកប្រើប្រាស់ទន្ទឹងរង់ចាំអស់ពេលជាយូរ។

ប៉ុន្តែ ស្របពេលជាមួយនឹងសមត្ថភាពចេះជួយធ្វើការងារផ្សេងៗ ទៅតាមពាក្យបញ្ជាដោយសំឡេងពីអ្នកប្រើប្រាស់ Bixby ត្រូវបានភ្ជាប់មកជាមួយប៊ូតុងពិសេសដាច់ដោយឡែកមួយសម្រាប់បើកដំណើរការ ដែលកំពុងធ្វើឱ្យអ្នកប្រើប្រាស់ជាច្រើន​មិនពេញចិត្ត។ មិនពេញចិត្តក៏ដោយសារតែវាចេះតែនាំឱ្យពួកគេច្រឡំដៃ ឬប៉ះចំដោយអចេតនាដែលនាំឱ្យមុខងារនេះបើកដំណើរឡើង ហើយអេក្រង់ទូរសព្ទក៏លោតភ្លឺឡើងស្របជាមួយគ្នាបីដូចជាប៉ះចំប៊ូតុង Power អីចឹងដែរ។

ដោយមើលឃើញបញ្ហាដូចនេះ Samsung កាលពីខែកញ្ញាក៏បានបន្ថែមមុខងារមួយសម្រាប់បិទដំណើរការវាផងដែរ តែប៊ូតុងចុចបើក/បីតរបស់វានៅតែមានសកម្មភាពនៅឡើយ។ ដោយឡែកម្តងនេះ ក្រុមហ៊ុនបានធ្វើកំណែកម្មវិធីនេះ ដើម្បីអនុញ្ញាតឱ្យអ្នកប្រើប្រាស់ Galaxy S8, S8 Plus, និង Note 8 អាចដក​ប៊ូតុង Bixby ចោលទាំងស្រុងបាន ដោយគ្រាន់តែចូលទៅកាន់ឃ្លាំងកម្មវិធី Galaxy Apps នៅលើទូរសព្ទខ្លួន រួចចុចលើមឺនុយសញ្ញាចុចបី (…) ហើយ​ចុចលើ My apps -> Update -> Update All។

បន្ទាប់ពីកំណែចុងក្រោយនៃកម្មវិធី Bixby ត្រូវបានទាញយក និងដំឡើងរួចរាល់ហើយ លោកអ្នកនឹងអាចចូលទៅកាន់ផ្ទាំង Home Screen របស់វា រួចស្វែងរក​មឺនុយ Settings ដើម្បីបិទដំណើរការប៊ូតុង Bixby ជាការស្រេច។

ធ្វើដូច្នេះ លោកអ្នកនឹងលែងមានការរំខានពីមុខងារជំនួយការសំឡេងឌីជីថលដោយចៃដន្យតទៅទៀតហើយ!

ប្រភពព័ត៌មាន: BGR

ចែកចាយបន្ត