Post News Media ព័ត៌មានបច្ចេកវិទ្យា មេ Apple ប្រា...

មេ Apple ប្រាប់ទើបដឹង ចិនកើបលុយពី App Store មិនចេះតិច តាំងពីបង្កើតឡើងដំបូង

ចែកចាយបន្ត

មេក្រុមហ៊ុន Apple លោក Time Cook ទើបប្រាប់នៅក្នុងវេទិកាកំពូល​មួយធ្វើឡើងក្នុងប្រទេសចិនថា ក្រុមអ្នកអភិវឌ្ឍកម្មវិធីក្នុងប្រទេសយក្សមួយនេះ រកចំណូល​បានពី App Store ខ្លួនសរុបចំនួន ១៦.៩៣ ពាន់លានដុល្លារ គិតចាប់តាំង​ពីបង្កើតឡើងដំបូងក្នុងឆ្នាំ ២០០៨។

លោក Cook បន្ថែមថា ចំនួននេះគឺស្មើរនឹង ២៥% នៃចំណូលសរុបរបស់ក្រុមអ្នកអភិវឌ្ឍកម្មវិធីសម្រាប់ App Store ជុំវិញសកល ដែលបើគិតក្នុងប្រទេសចិនតែ ឯង បច្ចុប្បន្ន គឺមានចំនួន ១.៨ លាននាក់។

លោកបានលើកឡើងបែបនេះ នៅឯវេទិកាស្តីពីគោល​នយោ​បាយ​ប្រព័ន្ធ​សាយ​ប៊ើ​សាធារណ:មួយ រៀបចំឡើងដោយរដ្ឋបាលសន្តិសុខប្រព័ន្ធ​អិុនធើណែតចិន នាទី​ក្រុង Wuzhen ខេត្ត Zhejiang នៅថ្ងៃអាទិត្យម្សិលមិញ។

កាលពីដើមឆ្នាំ Apple បាននិយាយថា ខ្លួនបានបង់លុយទៅក្រុមអ្នកសរសេរកម្មវិធីលក់លើ App​ Store នៅទូទាំងពិភពលោកសរុបចំនួន ៧០ ពាន់លានដុល្លារ។

គួររំឭកថា លោក Cook បានធ្វើទស្សនកិច្ចទៅកាន់ប្រទេសចិនពីរបីលើកហើយ គិតក្នុងឆ្នាំ ២០១៧ រាប់បញ្ចូលទាំងក្នុងខែតុលា ដែលលោកបានមកជួបជាមួយលោកប្រធានាធិបតីចិន Xi Jinping។

Apple ចាត់ទុកចិន គឺជាទីផ្សារធំបំផុតលំដាប់ទីបីរបស់ខ្លួន ប៉ុន្តែ ក្នុងរយ:កាលប៉ុន្មានឆ្នាំចុងក្រោយនេះ ក្រុមហ៊ុន​បានស្គាល់ការធ្លាក់ចុះចំណែកទីផ្សារ ក្រោមសន្ទុះកើនឡើងនៃវត្តមានស្មាតហ្វូនលំដាប់កំពូលៗពីគូប្រជែងម្ចាស់ផ្ទះ ដូចជា Huawei, Oppo, និង Vivo ជាដើម។

ទោះយ៉ាងណា ក្រុមហ៊ុនបច្ចេកវិទ្យាយក្សអាមេរិក សង្ឃឹមថាការលក់របស់ខ្លួននឹងកើនឡើងវិញ តាមរយ:ផលិតផលស្មាតហ្វូនស៊េរីថ្មី iPhone 8,​ 8 Plus និង X ដែលទើបចាប់ផ្តើមចែកចាយនៅក្នុងខែវិច្ឆិកា៕

ប្រភពព័ត៌មាន: reuters

ចែកចាយបន្ត