Post News Media ព័ត៌មានបច្ចេកវិទ្យា គួរទម្លាប់សាក...

គួរទម្លាប់សាកថ្មស្មាតហ្វូនអ្នកយ៉ាងម៉េច ទើបឱ្យវាកាន់ភ្លើងបានយូរបំផុត?

ចែកចាយបន្ត

បច្ចុប្បន្ន មានការយល់ឃើញខុសៗគ្នាចំពោះរបៀបសាកថ្មទូរសព្ទប្រភេទស្មាតហ្វូនដើម្បីឱ្យវាអាចបន្តអាយុកាល និងកាន់ភ្លើងបានយូរបំផុត។ ទន្ទឹមនឹងនេះ អ្នកប្រើ​ប្រាស់ទូទៅភាគច្រើន គឺមិនសូវចាប់អារម្មណ៍ទៅលើរឿងនេះនោះទេ។ ពួកគេគ្រាន់តែដោត ឬដកសាកថ្មទូរសព្ទតាមចិត្តចង់ប៉ុណ្ណោះ។ ហេតុដូច្នេះហើយ ទើបគេសង្កេតឃើញថា ថ្មទូរសព្ទរបស់អ្នកខ្លះកាន់ភ្លើងបានយូរ ឯរបស់អ្នកខ្លះប្រើមិនទាន់បានមួយឆ្នាំផងក៏លែងកាន់ទៅហើយ។

មែនទែនទៅ ថ្មទូរសព្ទក៏មានសុខភាពដែលទាមទារឱ្យអ្នកប្រើប្រាស់ចេះវិធី ឬមានទម្លាប់ល្អដើម្បីឱ្យវារឹងមាំ និងមានថាមពលខ្លាំង អាចកាន់ភ្លើងបានយូរ​បំផុតផងដែរ។

ថ្មប្រភេទលីចូមដែក (lithium-ion) ដែលគេនិយមយកទៅប្រើលើស្មាតហ្វូនភាគច្រើនលើសលុបនាពេលបច្ចុប្បន្ន មានរបៀបថែរក្សាខុសពីថ្មទូរសព្ទចល័តជំនាន់មុន ដែលទាមទារឱ្យសាកបំពេញដល់ ១០០% នោះ។

យោងតាមការសិក្សាថ្មីមួយពី Battery University ដោយធ្វើពិសោធតាមរយ:ការ​ដោត-ដកសាកថ្មទូរសព្ទប្រភេទលីចូមដែកក្នុងកម្រិតខុសៗគ្នាជាច្រើនរយដង បានផ្តល់នូវជម្រើសផ្សេងៗគ្នានៃវិធីសាកថ្មស្មាតហ្វូនដែលល្អបំផុតសម្រាប់លោកអ្នកអាចយកទៅអនុវត្តតាម ដូចខាងក្រោម៖

១- សាកពី ៦៥% ទៅ ៧៥% ជាជម្រើសដែលជួយឱ្យថ្មទូរសព្ទកាន់ភ្លើងបានយូរបំផុត ប៉ុន្តែ បើតាមការប្រើប្រាស់ជាក់ស្តែង វាមិនអាចទៅរួចនោះទេ ដែលលោកអ្នកត្រូវដាក់សាកថ្មរាល់ពេលដែលប្រើអស់ត្រឹម ១០% នោះ។

២- សាកពី ៤៥% ទៅ ៧៥% ជាជម្រើសល្អបំផុតទី២ ដោយវាជួយឱ្យថាមពលថ្ម​ស្រកមកត្រឹម ៩០% នៃថាមពលដើម ក្រោយពេលសាកបានចំនួន ៦៥០០ លើក។ប៉ុន្តែ វិធីទីនេះក៏មិនអាចទៅរួចដែរ ដែលលោកអ្នកត្រូវសាកថ្មញឹកញាប់យ៉ាងនេះនោះ។

៣- សាកពី ២៥% ទៅ ៧៥%-៨៥% ជាជម្រើសល្អបំផុតលំដាប់ទី ៣ និងទី ៤ ដែលលោកអ្នកអាចព្យាយាមអនុវត្តតាមបាន។ ថ្វីត្បិតវាមិនផ្តល់នូវថាមពលថ្ម​ដល់កម្រិតអតិបរមា តែវាជួយឱ្យថ្មនោះកាន់ភ្លើងបានយូរអង្វែង ជាងការសាកវាបំពេញដល់ ១០០% ដែលធ្វើឱ្យថ្មឆាប់ធ្លាក់ចុះគុណភាព។

៤- សាកពី ៤០-៥០% ទៅ ១០០% នេះគឺជាជម្រើសល្អបំផុតចុងក្រោយ ដែលលោក​អ្នកងាយអនុវត្តតាមបំផុត ធៀបនឹងជម្រើសខាងលើ។ ពោលគឺ លោកអ្នកអាចសាកថ្មទូរសព្ទបំពេញដល់ ១០០% តាមធម្មតា ប៉ុន្តែ គ្រាន់តែព្យាយាមដាក់សាកពេលវាស្រកមកនៅត្រឹម ៤០-៥០% ប៉ុណ្ណោះ៕

ប្រភពព័ត៌មាន: mashable

ចែកចាយបន្ត