Post News Media ព័ត៌មានបច្ចេកវិទ្យា Facebook កំពុ...

Facebook កំពុងសាកល្បងផ្តាច់សេវាផ្ញើសារ Direct ចេញពី Instagram

ចែកចាយបន្ត

ក្រុម​ហ៊ុន Facebook កាលពីថ្ងៃម្សិលមិញ បានចាប់ផ្តើមសាកល្បងកាត់ផ្តាច់សេវាផ្ញើសារ Direct ដែលមាននៅក្នុងកម្មវិធី Instagram ទៅបង្កើតជាកម្មវិធីដាច់ដោយឡែកមួយ ក្នុងគោលបំណងផ្តល់មុខងារផ្ញើសារនេះឱ្យកាន់តែសម្បូរបែប។

យោងប្រភពព័ត៌មានពី Phone Arena ជាជំហានដំបូង ក្រុមហ៊ុនបានសម្រេចដាក់ចេញកម្មវិធី Instagram Direct សម្រាប់អ្នកប្រើប្រាស់ទាញយកនៅក្នុងប្រទេសចំនួន ៦ រួមមាន៖ ឈីលី អ៉ីស្រាអែល អ៉ីតាលី ព័រទុយហ្គាល់ តួកគី និងអ៊ុយរូហ្គាយ។

កម្មវិធីផ្តោតសំខាន់លើការផ្តល់សេវាកម្មផ្ញើសារនេះ បើកចំហរដោយផ្ទាល់ទៅកាន់កម្មវិធីថតរូបក្នុងទូរសព្ទ។ ដូច្នេះ វាអាចជួយឱ្យការចែកចាយរូបថតឱ្យគ្នាទៅវិញទៅមកអាចប្រព្រឹត្តិទៅបានកាន់តែងាយស្រួលជាងមុន។

ទោះយ៉ាងណា ការបំបែកខ្លួននេះ កំពុងធ្វើឱ្យអ្នកប្រើប្រាស់ជាច្រើនកើតការមិនសប្បាយចិត្ត។ មិនសប្បាយចិត្តក៏ដោយសារតែពួកគេចាំបាច់ត្រូវប្រើកម្មវិធីដល់ទៅពីរ ដើម្បីអាចទទួលបានបទពិសោធន៍ពេញលេញជាមួយកម្មវិធីបណ្តាញទំនាក់ទំនងសង្គមរូបថត Instagram។

គួររំឭកថា កាលពី Messenger ត្រូវបានផ្តាច់ចេញពី Facebook វាមានចំនួនអ្នកប្រើប្រាស់សកម្មត្រឹមតែ ៥០០ លាននាក់ប៉ុណ្ណោះក្នុងមួយខែៗ ខណ:ឥឡូវ មានរហូតដល់ ១.៣ ពាន់លានឯណោះ។

ដូច្នេះ ការផ្តាច់មុខងារ Direct ចេញពី Instagram ពេលនេះ អាចនឹងជួយឱ្យសេវាកម្មផ្ញើសារនេះ កាន់តែមានប្រជាប្រិយភាព និងទទួលបានចំនួនអ្នកប្រើប្រាស់កើនឡើងមិនខុសពី Messenger បច្ចុប្បន្នក៏អាចថាបាន៕

ចែកចាយបន្ត