Post News Media ព័ត៌មានសេដ្ឋកិច្ច ភ្នំពេញ ត្រូវ...

ភ្នំពេញ ត្រូវការឈាមសម្រាប់សង្រ្គោះជីវិតពី ១៥០ ដល់ ២០០ប្លោកជារៀងរាល់ថ្ងៃ

ចែកចាយបន្ត

នៅតាមមន្ទីរពេទ្យនានា ក្នុងរាជធានីភ្នំពេញ អ្នកជម្ងឺត្រូវការឈាម សម្រាប់សង្គ្រោះជីវិត គឺពី ១៥០ ដល់ ២០០ប្លោកជារៀងរាល់ថ្ងៃ ដោយមិនទាន់បញ្ចូលតម្រូវការនៅតាមមន្ទីរពេទ្យខេត្តផ្សេង។ នេះបើយោងតាមទីភ្នាក់ងារសារព័ត៌មានជាតិ ចេញផ្សាយកាលពីម្សិលមិញនេះ។

លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាម បានឲ្យដឹងថា តាមការប៉ាន់ប្រមាណសម្រាប់ឆ្នាំ ២០១៧ខាងមុខនេះ តម្រូវការឈាមគឺ មានយ៉ាងតិចបំផុត ៧ម៉ឺនប្លោក ដែលជាតម្រូវការចាំបាច់របស់ប្រជាជនកម្ពុជា និងក្នុងវិស័យសុខាភិបាលទាំងមូល។

លោកបន្តថា តម្រូវការឈាម អាចកើនឡើងក្នុងមួយឆ្នាំ ១៥ម៉ឺនប្លោក ខណ:ដែលប្រជាពលរដ្ឋកម្ពុជា ១៥លាននាក់ មានអ្នកស្ម័គ្រចិត្តបរិច្ចាគឈាម តែ ១ភាគរយប៉ុណ្ណោះ។

ក្នុងឆ្នាំ ២០១៦នេះ ការប្រើប្រាស់ឈាមគ្រប់ប្រភេទ មានប្រមាណ ៦ម៉ឺន៥ពាន់ប្លោក ហើយគ្រាន់តែជាឆ្លើយតបទៅនឹងការព្យាបាលក្នុងករណីបន្ទាន់ៗ សំខាន់ៗ ហើយនាពេលអនាគត វិស័យសុខាភិបាល នឹងកាន់តែមានការរីកចម្រើន ឈាមទាំងអស់នេះ មិនទាន់គ្រប់គ្រាន់សម្រាប់ព្យាបាលជម្ងឺគ្រប់ប្រភេទនៅឡើយទេ។

ការប្រើប្រាស់ឈាម មានកំណើនប្រមាណពី ១០ ទៅ ១៥ភាគរយជារៀងរាល់ឆ្នាំ ដែលតម្រូវឲ្យមានការចូលរួមក្នុងការបរិច្ចាគឈាម ដើម្បីឆ្លើយតបទៅនឹងតម្រូវការឈាម នៅគ្រប់មន្ទីរពេទ្យទាំងអស់នៅទូទាំងប្រទេស។

គួរបញ្ជាក់ដែរ គិតរហូតមកដល់ចុងឆ្នាំ​ ២០១៦នេះ មជ្ឈមណ្ឌលជាតិផ្តល់ឈាមនៅរាជធានីភ្នំពេញ ទទួលឈាមនិងមានការផ្គត់ផ្គង់ឈាមប្រមាណ ៤៥០០០ប្លោក ខណ:ការទទួលឈាមសរុបទូទាំងប្រទេសមានចំនួន ៦៥០០០ប្លោក៕

ចែកចាយបន្ត