Post News Media ព័ត៌មានជាតិ បើករថយន្តរវល់...

បើករថយន្តរវល់តែប្រឡែងគ្នា ជ្រុលទៅបុកទ្រូងផ្លូវខ្ទេច ផ្អើលទាំងកណ្តាលយប់!

ចែកចាយបន្ត

ភ្នំពេញ: មនុស្សប្រុសស្រី២នាក់ ទំនងជាបើករថយន្តបណ្ដើរ ប្រឡែងគ្នាបណ្ដើរបណ្ដាលឲ្យជ្រុលចង្កូតទៅបុករបាំងថ្មចែកទ្រូងផ្លូវទាំងកម្រោល បាក់អស់ចំនួន៣កង់ ចំណែករថយន្ដកល់ជាប់ជាមួយរបាំងថ្ម ទៅមុខលែងរួច។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង២និង៤០នាទីរំលងអធ្រាត្រ ឈានចូលថ្ងៃ២៩ ខែមីនា ឆ្នាំ២០១៧ នៅតាមបណ្ដោយផ្លូវព្រះមុន្នីវង្ស កែងនឹងផ្លូវលេខ៣២២ ស្ថិតក្នុងសង្កាត់បឹងកេងកងទី១ ខណ្ឌចំកាមន រាជធានីភ្នំពេញ។

ប្រភពព័ត៌មានពីកន្លែងកើតហេតុបានប្រាប់ភ្នាក់ងារ Post Newsថា នៅមុនពេលកើតហេតុ គេបានឃើញរថយន្ដបង្កម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ 2AJ-8620 បើកបរតាមបណ្ដោយផ្លូវព្រះមុន្នីវង្ស ទិសដៅពីត្បូងទៅជើង ក្នុងល្បឿនលឿន ហើយពេលមកដល់ចំណុចកើតហេតុ ទំនងជាបើករថយន្តបណ្ដើរ ប្រឡែងគ្នាបណ្ដើរ ទើបបណ្ដាលឲ្យរថយន្ដរេចង្កូតបុករបាំងថ្មចែកទ្រូងផ្លូវទាំងកម្រោលបណ្ដាលឲ្យបាក់អស់ចំនួន៣កង់។ ចំណែករថយន្ដរងការខូចខាត កល់ជាប់ជាមួយរបាំងថ្មទៅមុខលែងរួច។

ក្រោយពីបង្កហេតុហើយនោះ គេបានឃើញមនុស្សប្រុសស្រីទាំង២នាក់ ដែលជិះក្នុងរថយន្ដ បានចុះពីលើរថយន្ដ ហើយនាំគ្នាគេចខ្លួនបាត់ពីកន្លែងកើតហេតុ។ ក្រោយមកទើបកម្លាំងសមត្ថកិច្ចមូលដ្ឋាន បានចុះដល់កន្លែងកើតហេតុ និងបានសហការជាមួយកម្លាំងជំនាញ ធ្វើការវាស់វែង ស្ទូចយករថយន្ដបង្កយកទៅរក្សា ទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្ដ ចូលខ្លួនមកដោះស្រាយគ្នាតាមផ្លូវច្បាប់៕

ចែកចាយបន្ត