Post News Media ព័ត៌មានសេដ្ឋកិច្ច Vietjet សម្ពោ...

Vietjet សម្ពោធផ្លូវហោះហើរអន្តរជាតិថ្មី ដាណាង-សេអ៊ូល សំបុត្រត្រឹមតែ ២៨ដុល្លារ

ចែកចាយបន្ត

ក្រុម​ហ៊ុន​អាកាសចរណ៍​ Vietjet បាន​សម្ពោធ​ប្រកាសផ្លូវ​ហោះ​ហើរអន្តរជាតិ​ថ្មី ​ពីទីក្រុង​ដាណាង ​ទៅ​កាន់​ទី​ក្រុង​សេអ៊ូល​ (ប្រទេស​កូរ៉េខាង​​ត្បូង)​​ ជាមួយតម្លៃសំបុត្រត្រឹមតែ ២៨ដុល្លារអាមេរិក។ នេះបើយោងតាមសេចក្តីប្រកាសព័ត៌មាននៅលើ គេហទំព័រ Vietjetair ធ្វើឡើងកាលពីពេលថ្មីៗនេះ។

ផ្លូវ​ហោះ​ហើរ​ពីទីក្រុង​ដាណាង​-ទីក្រុង​សេអ៊ូល ​នឹង​ធ្វើ​ប្រតិបត្តិការ​ជារៀង​រាល់​ថ្ងៃចាប់​ពី​ថ្ងៃ​ទី​ ៣១ ខែ​ឧសភា ឆ្នាំ​ ២០១៧ ជាមួយ​តម្លៃ​សំបុត្រ​ត្រឹមតែ ២៨ដុល្លារអាមេរិក។ ជើង​ហោះ​ហើរ​ចេញ​ពី​ទីក្រុង​ដាណាង​​គឺ​ចាប់​ផ្តើមហោះ​នៅ​ម៉ោង​ ២៣:៤៥នាទី (ម៉ោង​ក្នុង​ស្រុក) និង​មក​ដល់​សេអ៊ូល​នៅ​ម៉ោង​ ៦ព្រឹក(ម៉ោង​ក្នុង​ស្រុក​)។ ជើង​ហោះ​ហើរ​ត្រលប់​មក​វិញ​គឺ​ចាក​ចេញពី​សេអ៊ូល​​នៅ​ម៉ោង​ ៧:០០ (​ម៉ោង​ក្នុង​ស្រុក) និង​មក​ដល់​ដាណាង​នៅ​ម៉ោង​ ៩:៤០នាទី​។​

​​ជាមួយ​នឹង​ការ​សម្ពោធ​ផ្លូវ​ហោះ​ហើរ​​ថ្មី​ពី​ទីក្រុង​ដាណាង​ និង​ប្រទេស​កូរ៉េ​ខាង​ត្បូង​ ក្រុម​ហ៊ុន​ Vietjet មិន​ត្រឹម​តែផ្តល់​ឱ្យ​ប្រជាជន​ក្នុង​ស្រុក​ និង​អន្តរជាតិ​មាន​ឱកាស​បាន​ធ្វើ​ដំណើរ​ទេសចរណ៍​តាម​រយ: ការ​ហោះ​ហើរ​ប្រកប​ដោយ​សុវត្ថិភាព​ ទំនើប​ និង​ស៊ីវិល័យប៉ុណ្ណោះ​ទេ​ ថែម​ទាំង​ជំរុញ​ដល់​ការ​អភិវឌ្ឍ​ពាណិជ្ជកម្ម​ និង​ការ​វិនិយោគ​នៅ​ក្នុង​តំបន់​ទៀត​ផង​។​​​​​​

ក្រុមហ៊ុន នឹងបើកការកក់សំបុត្រយន្តហោះ ក្នុងតម្លៃ ២៨ដុល្លារអាមេរិក ជូនដល់អតិថិជន ក្នុងចន្លោះម៉ោងពិសេសគឺចាប់ពីម៉ោង ១២ថ្ងៃត្រង់ ដល់ម៉ោង ២រសៀល (ម៉ោងនៅវៀតណាម) ដោយលោកអ្នកគ្រាន់តែចូលទៅកាន់គេហទំព័ររបស់ក្រុមហ៊ុន www.vietjetair.com

ក្រុមហ៊ុនអាកាសចរណ៍ Vietjet ជាក្រុមហ៊ុនអាកាសចរណ៍ដំបូងគេបង្អស់ ក្នុងប្រទេសវៀតណាម ដែលបានប្រតិបត្តិការជាក្រុមហ៊ុនអាកាសចរណ៍ដ៏ថ្មីសន្លាង ជាមួយនឹងតម្លៃថោកសមរម្យ ព្រមទាំងសេវាកម្មដ៏ល្អ ដើម្បីបំពេញតាមតម្រូវការរបស់អតិថិជន។

ក្រុមហ៊ុនអាកាសចរណ៍នេះ ក៏ត្រូវបានដាក់បញ្ចូលទៅក្នុងបញ្ជីនៃ Top 500 Brands ប្រចាំតំបន់អាស៊ីក្នុងឆ្នាំ ២០១៦ ដោយក្រុមហ៊ុនស្រាវជ្រាវទីផ្សារសកលលោក Nielsen និងទទួលបានពានរង្វាន់ “Best Asian Low Cost Carrier” នៅក្នុងការប្រគល់រង្វាន់នៃកម្មវិធី TTG Travel Awards កាលពីឆ្នាំ ២០១៥ ដែលទទួលបានការបោះឆ្នោតគាំទ្រពីសំណាក់អតិថិជន ភ្នាក់ងារទេសចរណ៍ និងប្រតិបត្តិការទេសចរណ៍ទូទាំងតំបន់អាស៊ី។

គួរជម្រាបដែរថា ក្រុមហ៊ុនអាកាសចរណ៍Vietjet មានយន្តហោះចំនួន ៤៥គ្រឿង រួមមានយន្តហោះម៉ូដែល A320s និង A321s ព្រមទាំងប្រតិបត្តិការហោះហើរចំនួន ៣៥០ជើងក្នុងមួយថ្ងៃ ហើយមកដល់សព្វថ្ងៃនេះក្រុមហ៊ុននេះបានដឹកជញ្ជូនអ្នកដំណើរចំនួន ៣៥លាននាក់៕

ចែកចាយបន្ត