តាមការសិក្សាស្រាវជ្រាវបានបង្ហាញឱ្យដឹងថា ការសើចមិនត្រឹមតែជាការបង្ហាញពីទំនាក់ទំនងល្អចំពោះគ្នា ឬសម្រាប់ការកំប្លែងលេងប៉ុណ្ណោះទេ ប៉ុន្តែវាក៏ជាលំហាត់ប្រាណព្រមទាំងជាឱសថជំនួយសុខភាពរាងកាយផងដែរ។

ដើម្បីជ្រាប់ច្បាស់ថា ការសើចផ្ដល់នូវអត្ថប្រយោជន៍យ៉ាងណាខ្លះសម្រាប់សុខភាព សូមអានខាងក្រោមទាំងអស់គ្នា៖

១. មានទំនាក់ទំនងល្អ
សើចមិនត្រឹមតែបង្កើតបរិយាកាសសប្បាយ ឬការកំប្លែងលេងនោះទេ ប៉ុន្តែវាក៏អាចជួយធ្វើឱ្យមានទំនាក់ទំនងល្អរវាងគ្នានឹងគ្នាផងដែរ។

២. បង្កើនទំនុកចិត្ត
សម្រាប់ប្តីប្រពន្ធ ឬគូស្នេហ៍ ការសើច ឬការញញឹមអាចជួយឱ្យពួកគេមានអារម្មណ៍ស្រស់ថ្លា បង្កើនភាពទុកចិត្ត និងមានទំនាក់ទំនងល្អជាមួយគ្នាបានយូរអង្វែង។

៣. ការពារជំងឺបេះដូង
ថ្នាំ និងការរស់នៅប្រកបដោយអនាម័យ ត្រូវបានគេចាត់ទុកថាជាឱសថដ៏ប្រសើរសម្រាប់សុខភាព ប៉ុន្តែសើចក៏ជាផ្នែកមួយដ៏សំខាន់ចំពោះសុខភាពផងដែរ។ តាមការសិក្សាពីសាកលវិទ្យាល័យនៃមជ្ឈមណ្ឌលវេជ្ជសាស្ត្ររដ្ឋ Maryland បានរកឃើញថា អ្នកជំងឺបេះដូងដែលសើចតិចមានអាការឆាប់ខឹង និងប្រទូសរ៉ាយខ្លាំងជាងអ្នកជំងឺសើចបានច្រើន។

៤. ជួយដុតជាតិកាឡូរី
តាមការសិក្សាស្រាវជ្រាវនៃសកលវិទ្យាល័យ Vanderbilt បានឱ្យដឹងថា ការចំណាយពេលសើចចាប់ពី ១០ ទៅ ១៥ នាទី អាចជួយជំនួយដល់សុខភាពបេះដូង និងជួយដុតបំផ្លាយជាតិកាឡូរីក្នុងខ្លួនបានទៀតផង។

៥. បង្កើនការចងចាំ
ការមើលកម្សាន្តជាមួយវីដេអូបែបសប្បាយ ឬកំប្លែងៗរយៈពេល ២០ នាទី អាចជួយបំបាត់ភាពតានតឹង និងបង្កើនការចងចាំដល់ខួរក្បាល ជាពិសេសសម្រាប់មនុស្សវ័យចំណាស់។

៦. ពង្រឹងប្រព័ន្ធភាពស៊ាំ
ការសើចមិនត្រឹមតែអាចជួយកាត់បន្ថយភាពតប់ប្រមល់ប៉ុណ្ណោះទេ ប៉ុន្តែថែមទាំងជួយបង្កើន និងពង្រឹងប្រព័ន្ធភាពស៊ាំក្នុងរាងកាយទៀតផង។

៧. អារម្មណ៍ស្រស់ថ្លា
បើទោះបីពេលខ្លះ អ្នកកំពុងស្ថិតនៅក្នុងស្ថានភាពភ័យខ្លាច ឬតានតឹងយ៉ាងណាក៏ដោយ អ្នកគួរតែគ្រប់គ្រងអារម្មណ៍របស់អ្នកឱ្យមានតុល្យភាព ដូចជាការព្យាយាមសើចជាដើម ក៏អាចជួយឱ្យអ្នកមានភាពធូរស្បើយ និងស្រស់ថ្លាក្នុងអារម្មណ៍បាន។

៨. បង្កើនភាពស្និទ្ធស្នាល
បើយោងតាមអ្នកស្រាវជ្រាវនៅសាកលវិទ្យាល័យទីក្រុងឡុងដ៍ បានរកឃើញថា ការសើចដាក់គ្នាមុននឹងចាប់ផ្ដើមការសន្ទនា គឺអាចជួយបង្កើតភាពស្និទ្ធស្នាលរវាងគ្នាទៅវិញមក។