Post News Media ព័ត៌មានអន្តរជាតិ រដ្ឋមន្ត្រីកា...

រដ្ឋមន្ត្រីការបរទេសអាស៊ាន បង្ហាញពីក្ដីព្រួយបារម្ភយ៉ាងខ្លាំង ជុំវិញស្ថានការណ៍នៅកូរ៉េខាងជើង

ចែកចាយបន្ត

អាស៊ាន: ក្រុមរដ្ឋមន្ត្រីការបរទេស នៃសមាគមប្រជាជាតិអាស៊ីអាគ្នេយ៍ (ASEAN) បានចេញសេចក្តីថ្លែងការណ៍មួយ នៅថ្ងៃសុក្រនេះ ដោយបានសម្តែងនូវក្តីបារម្ភយ៉ាងធ្ងន់ធ្ងរលើស្ថានការណ៍ នៅក្នុងប្រទេសកូរ៉េខាងជើង។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២៨ ខែមេសា ឆ្នាំ២០១៧។

ក្នុងសេចក្តីថ្លែងការណ៍នោះ បានសេរសេរថា «អាស៊ានមានការព្រួយបារម្ភយ៉ាងខ្លាំង ពាក់ព័ន្ធនឹងភាពតានតឹង នៅលើឧបទ្វីបកូរ៉េ ដោយរួមបញ្ចូលទាំងការធ្វើតេស្តនុយក្លេអ៊ែរចំនួនពីរលើក នៅក្នុងឆ្នាំ ២០១៦ និងការបាញ់មីស៊ីលផ្លោងជាបន្តបន្ទាប់របស់កូរ៉េខាងជើង»។

លើសពីនេះទៅទៀត អាស៊ានបានអះអាងថា បញ្ហាអស្ថេរភាពនៅឧបទ្វីបកូរ៉េ នឹងបង្កផលប៉ះពាល់យ៉ាងធ្ងន់ធ្ងរ នៅក្នុងតំបន់ និងបណ្ដាលប្រទេសជិតខាងផងដែរ។

រដ្ឋមន្ត្រីក្រសួងការបរទេស បានប្រាប់ទៅប្រទេសដែលជាសម្ព័ន្ធមិត្ត នៃរបបព្យុងយ៉ាងឲ្យជួយជំរុញប្រទេសនេះ ព្រមគោរពតាមកាតព្វកិច្ចរបស់ខ្លួន លើដំណោះស្រាយនៃសេចក្ដី សម្រេចរបស់ក្រុមប្រឹក្សាសន្តិសុខ អង្គការសហប្រជាជាតិ និងច្បាប់អន្ដរជាតិ ដើម្បីការរក្សាសន្តិភាព និងសន្តិសុខពិភពលោក។

សេចក្តីថ្លែងការណ៍នេះ ក៏បានអំពាវនាវឲ្យភាគីពាក់ព័ន្ធទាំងអស់ ប្រកាន់នូវភាពអត់ធ្មត់ ក្នុងគោលបំណង ដើម្បីបន្ថយភាពតានតឹង និងទប់ស្កាត់សកម្មភាព ឬពាក្យសម្ដីណាមួយ ដែលអាចធ្វើឲ្យបង្កហេតុបាន»៕