Post News Media ព័ត៌មានអន្តរជាតិ គណ:រដ្ឋមន្ត្រ...

គណ:រដ្ឋមន្ត្រីជប៉ុន អនុម័តច្បាប់មួយ អនុញ្ញាតឲ្យព្រះចៅអធិរាជ Akihito ដាក់រាជ្យ

ចែកចាយបន្ត

ជប៉ុន: រដ្ឋាភិបាលក្រុងតូក្យូ នៅថ្ងៃសុក្រនេះ បានអនុម័តលើសេចក្ដីព្រាងច្បាប់មួយ ដែលអនុញ្ញាតឲ្យ​ព្រះចៅអធិរាជជប៉ុន Akihito ដាក់រាជ្យបល្ល័ង្ក Chrysanthemum ជាផ្លូវការ ខណ:វាជារឿងមិនធ្លាប់​កើតមានក្នុងខ្សែរាជវង្សជប៉ុនអស់រយ:ពេល ២ សតវត្សរ៍កន្លងមកហើយ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី១៩ ខែឧសភា ឆ្នាំ២០១៧។

គណ:រដ្ឋមន្ត្រីរបស់នាយករដ្ឋមន្ត្រីជប៉ុនលោក ស៊ីនហ្សូ អាបេ បានចុះហត្ថលេខាលើសេចក្តីព្រាងច្បាប់នេះ បញ្ជូនទៅកាន់សភា សម្រាប់ការជជែកពិភាក្សា និងរងចាំការអនុម័តចុងក្រោយ។

ព្រះចៅអធិរាជជប៉ុន Akihito មានព្រះជន្មាយុ ៨៣វស្សា​ បានសម្រេចដាក់រាជ្យ កាលពីខែកក្កដា ដោយសារព្រះអង្គ​មានបញ្ហាសុខភាពកាន់​តែទ្រុឌទ្រោម​ដែលមិនអាចតស៊ូព្រះកាយ ជាមួយនឹងរាជកិច្ចជាច្រើន​បន្តទៀត។

គួរបញ្ជាក់ដែរថា ដោយសារច្បាប់​រាជវង្សជប៉ុន គឺមិនមាន​ផ្លូវណាមួយ សម្រាប់អាចឲ្យ​ព្រះអង្គធ្វើការដាក់រាជ្យ​បានទ្បើយ ជាហេតុនាំឲ្យគណរដ្ឋមន្ត្រី​ជប៉ុន ចាប់ផ្តើមគិតគូរ​សម្រួលច្បាប់នេះឡើងមក៕