Post News Media ព័ត៌មានសិល្បៈ និងកម្សាន្ត តារាល្បីៗជាង៨...

តារាល្បីៗជាង៨០តួ ចូលរួមព្រឹត្តិការណ៍កម្រាលព្រំប្រចាំឆ្នាំ នៅស្ដាតអូឡាំពិក

ចែកចាយបន្ត

នៅថ្ងៃទី២២ ឧសភា នេះ តារាចម្រៀង តារាកំប្លែង ពិធីករពិធីការិនី និងតារាសម្ដែងដែលសុទ្ធតែមានឈ្មោះបោះសំឡេងនៅក្នុងភពសិល្ប:យ៉ាងហោចជាង៨០តួ បានប្រកាសរួមគ្នាថានឹងបង្ហាញខ្លួននៅក្នុងព្រឹត្តិការណ៍កម្រាលព្រំប្រចាំឆ្នាំលើកទី២របស់គ្រួសារតារាកម្ពុជា នៅស្ដាតអូឡាំពិក បន្ទាប់ពីព្រឹត្តិការណ៍នេះធ្លាប់បានជោគជ័យម្ដងហើយកាលពីខែ៨ឆ្នាំមុន នៅសាកលវិទ្យាល័យន័រតុន។ នេះជាការរួមកម្លាំងរបស់តារាសិល្ប:ទ្រង់ទ្រាយធំ ដើម្បីប្រមូលថវិកាពីគ្រប់សប្បុរសជនជូនដល់មន្ទីរពេទ្យគន្ធបុប្ផា។

លោកផាត់ តារារដ្ឋ អ្នករៀបចំព្រឹត្តិការណ៍ និងជាស្ថាបនិក«គ្រួសារតារាកម្ពុជា» បានអះអាងថាដោយសារតែមានការចូលរួមពីដៃគូសហការ និងសហព័ន្ធកីឡាទាញព្រ័ត្រកម្ពុជា ដែលគាំទ្រដោយក្រសួងអប់រំ ទើប«គ្រួសារតារាកម្ពុជា»មានលទ្ធភាពរៀបចំព្រឹត្តិការណ៍កម្រាលព្រំប្រចាំឆ្នាំនេះឡើងជាលើកទី២ ដោយព្រឹត្តិការណ៍ឆ្នាំនេះលោកចាត់ទុកថាជាព្រឹត្តិការណ៍ធំដែលមានសុទ្ធតែតារាល្បីៗនៅក្នុងប្រទេសកម្ពុជាចូលរួម ហើយត្រូវបានធ្វើឡើងនៅក្នុងទីតាំងស្ដាតអូឡាំពិក ដែលមិនខ្វះមហាជនចូលរួមគាំទ្រ។ លោកថាព្រឹត្តិការណ៍នេះមិនផ្ដោតការប្រគំតន្ត្រីតែមួយមុខនោះទេ តែផ្ដោតជាសំខាន់លើការបញ្ចេញសមត្ថភាព ការដើរលើកម្រាលព្រំនៅចំកណ្ដាលស្ដាតអូឡាំពិកដែលមានអ្នកទស្សនាកុះករ និងមានប្រតិភូដែលសុទ្ធតែជាបុគ្គលល្បីៗអង្គុយទស្សនា។

ព្រឹត្តិការណ៍នេះត្រូវបានអញ្ជើញចូលរួមផ្ដល់ប័ណ្ណសរសើរដល់តារាដែលបានសម្ដែងលើឆាក និងតារាដែលបានស្ម័គ្រចិត្តរ៉ៃអង្គាសថវិកានៅក្នុងពិធីដោយផលិតករ ម្ចាស់ក្រុមហ៊ុនធំៗ និងតារាល្បីៗ ដែលក្នុងនោះគ្រាន់តែសមាសភាពជាសិល្បករផលិតករដែលចូលរួមផ្ដល់ប័ណ្ណសរសើររួមមាន លោក សុះ ម៉ាច ប្រធានសមាគមសិល្បករខ្មែរ លោកហ្វៃ សំអាង ផលិតករល្បីឈ្មោះ លោកសុខ ជំនោ អ្នកនិពន្ធល្បីឈ្មោះ លោកសុវណ្ណ រិទ្ធី ហៅលោកតាវ៉ិចទ័រ ប្រធានផលិតនៅCTN អ្នកនាងសឿ សុធារ៉ា អ្នកនាងស្វែង សុជាតា កញ្ញាឌួង ហ្សូរីដា អ្នកនាងឈួន សុវណ្ណឆៃ លោកពូឃ្លោក និងម្ចាស់ផលិតកម្មល្បីឈ្មោះជាច្រើនរូបទៀតដែលសុទ្ធតែមានឥទ្ធិពលនៅក្នុងពិភពសិល្ប:។

ក្នុងនោះតារាៗជំនាន់ក្រោយផ្សេងទៀត ក៏បើកទូលាយឲ្យចូលទស្សនាផងដែរ ដើម្បីផ្ដល់ឱកាសឲ្យតារាទាំងនោះដើរកាត់លើកម្រាលព្រំដែលអមដោយមហាជននៅក្នុងបរិវេណវេទិកា។ អ្វីដែលពិសេសគឺព្រឹត្តិការណ៍នេះមានការចូលរួមដល់ឥស្សរជនជាមន្ត្រីរាជការថ្នាក់ក្រសួង និងឥស្សរជនជាអ្នកមានមុខមានមាត់យ៉ាងច្រើនកុះករ ដែលត្រូវបានអញ្ជើញឲ្យចូលរួម។ លោកថាហេតុផង ដែលនាំឲ្យកម្មវិធីនេះបានក្លាយជាទ្រង់ទ្រាយធំសម្រាប់ឆ្នាំទី២នេះ គឺដោយសារតែសហព័ន្ធកីឡាទាញព្រ័ត្រកម្ពុជា បានបើកព្រឹត្តិការណ៍ប្រកួតជ្រើសរើសជើងប្រចាំឆ្នាំ២០១៧ទ្រង់ទ្រាយធំនៅស្ដាតអូឡាំពិក ដោយមានការតាំងពិព័រណ៍ និងប្រគំតន្ត្រីរយ:ពេល៥ថ្ងៃតាំងពីថ្ងៃទី១៨ ឧសភា ហើយបានប្រគល់វេទិកានៅថ្ងៃចុងក្រោយឲ្យគ្រួសារតារាកម្ពុជារៀបចំព្រឹត្តិការណ៍កម្រាលព្រំប្រចាំឆ្នាំ ដើម្បីរួមគ្នារ៉ៃអង្គាសថវិកាជួយដល់គន្ធបុប្ផា ក្នុងនាមសហការគ្នា។ លោកថាតារាសិល្ប:សុទ្ធតែបានបង្ហាញឆន្ទ:ចូលរួមក្នុងព្រឹត្តិការណ៍នេះ ដោយតារាម្នាក់ៗសុទ្ធតែមានការបំផុសឲ្យមហាជនដែលចូលរួមទស្សនាដោយសេរីបរិច្ចាគថវិកាដើម្បីជួយដល់គន្ធបុប្ផានោះផង។ ព្រឹត្តិការណ៍កម្រាលព្រំប្រចាំឆ្នាំលើកទី២នេះ លោកថា គ្រួសារតារាកម្ពុជានឹងផ្ដល់ឱកាសឲ្យតារាសិល្ប:បានបង្ហាញឆន្ទ:នៅលើឆាកធំ និងកម្រាលព្រំវែងនៅកណ្ដាលមហាជន ដោយលោកចាត់ទុកថាតារាដែលត្រូវបានអញ្ជើញឲ្យសម្ដែង និងទទួលប័ណ្ណសរសើរពីសំណាក់អ្នកល្បីៗជារៀមច្បង គឺជាតារាដែលមានកិត្តិយស។ ព្រឹត្តិការណ៍នេះលោកមានបំណងរៀបចំមួយឆ្នាំម្ដង ឬ២ឆ្នាំម្ដង ដើម្បីលើកមុខលើកមាត់តារាសិល្ប: ដើម្បីឲ្យមហាជនមើលឃើញពីតម្លៃឆន្ទ:ជួយសង្គមរបស់តារាសិល្ប: ដើម្បីកុំឲ្យអ្នកមិនគាំទ្រសិល្ប:មួយចំនួនតួចយល់ថាអ្នកសិល្ប:មិនសូវសហការគ្នាធ្វើកិច្ចសង្គមដោយមិនទទួលកម្រៃ។

តារាចម្រៀងល្បីៗរួមមានអ្នកនាងពេជ្រ សោភា លោកណុប បាយ៉ារិទ្ធិ កញ្ញាសុខ ពិសី កញ្ញាទេព បូព្រឹក្ស លោកនីកូ អ្នកនាងយក់ ឋិតរដ្ឋា កញ្ញាផន ស្រីខួច កញ្ញាវី ឌីណែត លោកនៅ ស៊ីនឿន នាយចឺម ក្រុមកំប្លែងលោកពែកមី ក្រុមកំប្លែងយ៉េយ៉េ កញ្ញានី មុន្នីនាថ អ្នកនាងលី ម៉ារីណា អ្នកនាងប៉េងប៉ោង កញ្ញាប៉ុបពី អ្នកនាងស៊ុន ណារីម៉ូនីកា លោកអ៊ុន សុធា កញ្ញាទឹម រដ្ឋា និងតារាល្បីៗយ៉ាងច្រើនកុះករនឹងបើកព្រឹត្តិការណ៍កម្រាលព្រំនេះចាប់ពីម៉ោង២រសៀលតទៅ។ លោកថានេះក៏ជំនួបធំមួយ ដែលអ្នកគាំទ្រតារាសិល្ប:មានឱកាសប៉ះដៃផ្ទាល់ និងថតរូបជាមួយតារាដែលខ្លួនស្រឡាញ់ដោយគ្មានការរំខានផងដែរ៕