Post News Media ព័ត៌មានអន្តរជាតិ ជប៉ុន ចេញសេចក...

ជប៉ុន ចេញសេចក្ដីព្រមានឲ្យពលរដ្ឋខ្លួន ៣០០.០០០ នាក់ ប្រុងប្រយ័ត្នចំពេលមានភ្លៀងធ្លាក់ខ្លាំង

ចែកចាយបន្ត

ជប៉ុន: ទីភ្នាក់ងារឧតុនិយមក្នុងប្រទេស (JMA) នៅថ្ងៃពុធនេះ បានព្រមានពីគ្រោះទឹកជំនន់ និងការរអិលបាក់ភក់ ដែលអាចកើតមានឡើង សម្រាប់ប្រជាជនខ្លួនប្រហែល ៣០០.០០០ នាក់ នៅទីក្រុង Hamamatsu ក្នុងខេត្ត Shizuoka និងតំបន់ Chubu នៃកោះ Honshu ។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃ២១ ខែមិថុនា ឆ្នាំ២០១៧។

អាជ្ញាធរក្នុងតំបន់ បានព្រមានថា ទឹកទន្លេ Tsuribashi នៅក្នុងទីក្រុង Hamamatsu បានឈានដល់កម្រិត គ្រោះថ្នាក់រួចទៅហើយ ដោយច្រាំងទន្លេរបស់វា អាចនឹងជន់ជោរនៅតំបន់ជុំវិញ ប្រសិនបើមានភ្លៀងធ្លាក់ខ្លាំង។

ប្រភពដដែរ បានបញ្ជាក់ថា ក្នុងរយ:ពេល ២៤ ម៉ោងចុងក្រោយនេះ បរិមាណទឹកភ្លៀងបានកើនទ្បើងហួសកំណត់ គឺ២០០ មីល្លីម៉ែត្រ នៅក្នុងខេត្ត Shizuoka និង ២៥០ មីល្លីម៉ែត្រ នៅខេត្ត Mie ខណ:ដែលទីភ្នាក់ងារអាកាសធាតុ បានឲ្យដឹងថា នៅខេត្ត Wakayama មានភ្លៀងធ្លាក់លើសពី ៤០០ មីល្លីម៉ែត្រឯណ្ណោះ។

ចំណែកឯតំបន់ Kanto-Koshin រួមបញ្ចូលទាំងទីក្រុងតូក្យូ មានភ្លៀងធ្លាក់ ៤០ មីលីម៉ែត្រ និងខ្យល់បក់ខ្លាំង ក្នុងរយ:មួយម៉ោង។

ក្នុងនោះដែរ ប្រព័ន្ធដឹកជញ្ជូនមួយចំនួន ត្រូវបានរងផលប៉ះពាល់ រួមទាំងបញ្ចូលទាំងរថភ្លើង Tokaido Shinkansen ត្រូវបានផ្អាកសេវាកម្មរបស់ខ្លួនផងដែរ៕