Post News Media ព័ត៌មានអន្តរជាតិ Update៖ ក្តីស...

Update៖ ក្តីសង្ឃឹមដ៏អាប់អួរ នៅក្នុងការស្វែងរកអ្នកបាត់ខ្លួន ៩៣ នាក់ បន្ទាប់ពីករណីរអិលបាក់ដីនៅចិន

ចែកចាយបន្ត

ចិន: ក្រុមអ្នកជួយសង្គ្រោះ កាលពីថ្ងៃអាទិត្យ បានជីកថ្ម និងដី ដើម្បីស្វែងរកមនុស្សជាង ៩០ នាក់ទៀត កំពុងបាត់ខ្លួន បន្ទាប់ពីករណីបាក់ផ្ទាំងដីដ៏ធំ បានរលំកប់ភូមិមួយ នៅភាគនិរតីនៃប្រទេសចិន ខណ:ដែលសាច់ញាតិជនរងគ្រោះមួយចំនួន បានបាត់បង់ក្ដីសង្ឃឹម ចំពោះការស្វែងរកពួកគេ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៦ ខែមិថុនា ឆ្នាំ២០១៧។

ប្រភពពីរដ្ឋាភិបាលក្នុងតំបន់ បាននិយាយថា យ៉ាងហោចណាស់មនុស្ស ១០ នាក់ ត្រូវបានអះអាងថា ស្លាប់មួយថ្ងៃបន្ទាប់ពីផ្ទាំងដីបានរលំកប់លំនៅដ្ឋានចំនួន ៦២ ខ្នង នៅក្នុងភូមិ Xinmo ជាភូមិភ្នំមួយ ដែលមានទេសភាពស្រស់ស្អាត ស្ថិតនៅតាមដងទន្លេខេត្តស៊ីឈួន។

នៅក្នុងហេតុការណ៍រអិលបាក់ដីនេះ គឺមានអ្នករស់រានមានជីវិតតែបីនាក់ប៉ុណ្ណោះ រួមមាន ប្តីប្រពន្ធ និងទារកអាយុមួយខែ ដែលត្រូវបានគេរកឃើញ ចាប់តាំងពីមានភ្លៀងធ្លាក់ខ្លាំង បាននាំយកផ្ទាំងដីដ៏ធំបាក់រលំចុះពីភ្នំ នៅតំបន់ទីបេ និង Qiang កប់ភូមិមួយកាលពីព្រឹកថ្ងៃសៅរ៍។

គួរបញ្ជាក់ដែរថា អ្នកឯកទេសភូគព្ភសាស្ដ្រ នៅតំបន់នោះ បាននិយាយថា ការស្វែងរកអ្នកនៅរស់រានមានជីវិត នៅក្នុងហេតុការណ៍នេះ គឺពិតជាមានសង្ឈឹមតិចតួចណាស់៕